Tarıhı ataýlar tańdaldy

Aqtóbe qalasynyń aýmaǵy men shekarasy jyldan-jylǵa ósip keledi. Qazirgi kezde oblys ortalyǵynyń ishinde de, syrtynda da jańa kósheler men oramdar paıda bolýda. Onyń bárine ataý kerek ekeni belgili. Áıtpese el-jurt jańa meken­jaılar men ǵımarattardy qaı­dan izdep tabaryn bilmeı, áýre-sarsańǵa túspeı me? Onyń ús­ti­ne Aqtóbe qalasynyń qura­­­my­­na kiretin Aqjar, Aqjar-2, Zarechnyı, Kirpishti, Raýan jáne Iаsnyı sekildi turǵyn úı aýdan­darynda biraz kósheler áli kúnge deıin ataýsyz qalyp kelipti. 

Osyǵan oraı Aqtóbe oblys­tyq máslıhaty 2018 jyl­dyń naýryz ­aıynda 67 kóshege ataý berý jóninde sheshim qabyl­daǵan edi. Mine, sol kezden beri 4-5 aı syrǵyp óte shyǵypty. Osy ýaqyttyń aralyǵynda ja­ńa kóshe ataýlary ádilet organ­darynda tirkelip, tıisti qu­jattary rettelgen. Búgin­gi kúni qaı kóshe ekenin aıǵaq­taıtyn kórsetkishter men bel­gilerdi ilý men ornatý jumys­tary qolǵa alynǵan. 

Sonymen bir mezgilde táýel­sizdik pen búgingi jańa Qa­zaqstan qoǵamy talaptarymen sáıkese almaıtyn kóshelerdi el-jurttyń zerdesinde saq­talyp qalǵan burynǵy tól ataý­­larymen almastyrý nemese ony basqasha ataý sharalary da máslıhat sheshimine sáıkes júıeli túrde júrgizilip keledi. Bul jóninde gazet tilshisine Aq­­­tóbe oblystyq tilderdi damy­tý basqarmasynyń basshysy Gú­l­aıym Tólebaeva aıtyp berdi. 

Aıtalyq, naqty derekterge súıensek, qalanyń qaq orta­lyǵyndaǵy Ǵazıza Jubanova kóshesimen qıylysatyn ­ataýsyz kóshe búgingi Konstıtýsııamyz­dyń túpki tórkini – «Jeti jar­ǵyny» ómirge keltirgen Táýke hannyń esimin ıelenýi qaı turǵydan da qısyndy ári ja­rasymdy kórinedi. Osy yńǵaı­men taǵy da ári qaraı tiz­beleı tússek, Qabanbaı ba­tyr, Júsip Balasaǵun, Aqan seri, Aqtan Kereıuly jáne Er Qosaı sekildi tarıhı tul­ǵalardyń aty-jónderi halqy­myzdyń arǵy-bergi tarıhymen tyǵyz úılesim taýyp tur­ǵany talassyz. Sonymen birge Qozy Kórpesh, Qalqaman – Mamyr, Naryn, Sáıgúlik jáne Oqjetpes syndy ataý­lar da búgingi urpaq ókilderin asyl da asqaq sezimdi pir tutýǵa jáne týǵan topyraq pen ejelgi salt-dástúrlerdi qasterleýge úndeı alary anyq. 

Bul arada kóshe ataýlarynan kórinip turǵanyndaı, oblystyq máslıhat depýtattary aımaqtyq tar óristilikten boılaryn aýlaq salyp, tutas­taı elimiz maqtan tutatyn tarıhı tulǵalardyń esimderi men kıeli jer ataýlaryn asqaq­tatýǵa basymdyq bergeni aıqyn baıqalady. 

Temir QUSAIYN,

«Egemen Qazaqstan»

AQTО́BE