Qaraǵandynyń irgesindegi Spassk polıgonynda arnaıy maqsattaǵy mergenderdiń «Altyn úki - 2018» halyqaralyq saıysy ótti. Oǵan Qazaqstanmen qatar, Belarýs, Belgııa, Ulybrıtanııa, Úndistan, BAÁ, Italııa, Qytaı, Qyrǵyzstan, Pákistan, Reseı, О́zbekstan elderiniń úzdik jaýyngerleri qatysqan bolatyn. Al Túrkııa men Ońtústik Koreıanyń ókilderi bul synǵa tek baqylaýshy retinde qatysty.
– Bul syn jaı jarys emes, onyń máni – jaýyngerlerimizdiń saıyskerlik rýhyn kóterý, áskerı áriptestik senimin arttyrý, – dedi sharanyń ashylý saltanatynda Qazaqstan Respýblıkasynyń Qorǵanys mınıstri Nurlan Ermekbaev. – Osy básekege qyzyǵýshy áskerı qyzmetkerlerdiń qatary bizdiń elimizde de, sheteldik áriptesterimizdiń arasynda da jyl saıyn artyp keledi. Mergender saıysy degenimiz, nysanaǵa dóp tıgizý mashyǵyn, qarýdy meńgerý sheberligin kórsetý, túrli strategııalyq jáne barlaý tapsyrmalaryn oryndaı bilý. Bul saıysqa qatysýshy elderdiń úzdik mergenderi kelip otyr. Iаǵnı biz naǵyz surmergenderdiń ónerine kýá bolamyz.
Al Qaraǵandy oblysynyń ákimi Erlan Qoshanov óz sózinde bul shara terrorızmmen birlese kúresýge jasalǵan mańyzdy qadam ekenin atap ótti.
– «Altyn úki» áskerı ónerdiń dástúrli merekesine aınalǵanyna qýanyshtymyn, – dedi Erlan Jaqanuly. – Elbasy aıtqandaı, «Terrorızm shekara talǵamaıdy jáne elderdi baı-kedeı dep bólmeıdi». Osyndaı saıystar ortaq jaýlarymyzben kúresýge septigin tıgizedi dep senemin. Mergender – kez kelgen armııanyń elıtasy. Naǵyz mergenge tán tabıǵat pen minez árkimge buıyrmaǵan. Tarıhta Álııa Moldaǵulova, Tóleýǵalı Ábdibekov sııaqty qaharman mergender jaıly ańyzǵa bergisiz áńgimeler az emes. Sol batyrlar sizderge kásibı de, ómirlik te úlgi bolsyn.
Uıymdastyrýshylar jarysty shynaıylyqqa meılinshe jaqyn etýge tyrysqan. Qatysýshylar klassıkalyq atýdan, qozǵalystaǵy nysanany atýdan jáne túrli qıyn jaǵdaıda kúrdeli taktıkalyq túıinderdi sheshýden, jasyryný men turǵan jerin baǵdarlaýdan synǵa tústi. Bulardyń bárindegi negizgi talap – dáldik pen jyldamdyq. Aıta ketý kerek, bıyl jaýyngerlerge óz qarýlarymen, arnaıy kıim-keshekterimen kelýge ruqsat etilgen. Bul olardyń ózderin neǵurlym jaıly sezinýi úshin de qajet.
Qatysýshylar óte joǵary deńgeıde óner kórsetti. Komandalyq esepte Qazaqstan Respýblıkasy Qorǵanys mınıstrliginiń arnaıy maqsattaǵy bólimshesiniń jaýyngerleri jeńimpaz atandy. Ekinshi orynǵa Belarýs, úshinshi orynǵa Qytaı elderiniń quramalary ıe boldy.
Qaırat ÁBILDA,
«Egemen Qazaqstan»
QARAǴANDY