15 qyrkúıekte Almatyda jańa Halyqaralyq kınofestıval shymyldyǵyn túredi. Bul shara qala ákimdiginiń bastamasymen alǵash ret uıymdastyrylyp otyr.
Sergeı Dvorsevoıdyń «Aıka» fılminde basty róldi oınaǵan Samal Eslıamova Kann kınovestıvalinde eń úzdik áıel roli nomınasııasymen marapattalǵan bolatyn. Bıyl alǵash ret Almatyda uıymdastyrylyp jatqan Almaty Film halyqaralyq festıvali dál osy fılmmen ashylady.
«Bul kınofestıvaldiń maqsaty – Qazaqstan kınoındýstrııasyna halyqaralyq jobalardy tartyp, Almatynyń mártebesin álemge tanytý» deıdi uıymdastyrýshylar.
Baıqaýǵa 10 fılm qatysady. Olar «Úzdik rejısser», «Úzdik akter», «Úzdik aktrısa» atalymdary boıynsha marapattalady.
Konkýrstan tys 21 fılm kórermender nazaryna usynylady. Úzdikterdi otandyq jáne sheteldik kınomamandardan quralǵan qazylar alqasy sarapqa salady. Sonymen qatar halyqaralyq kınofestıval barysynda «Tulpar» ulttyq syılyǵy tabystalady.
Kınofestıval aıasynda kórsetiletin kınolardy almatylyq kórermender tegin tamashalaı alady.
«Biz Halyqaralyq joba arqyly sheteldik áriptesterimizdi Almaty men Almaty oblysy aýmaǵynda birlesip kıno túsirýge tartqymyz keledi. Bul birinshi kezekte jekemenshik kınoǵa úlken qoldaý bolar edi. Sondaı-aq, halyqaralyq deńgeıge shyǵýǵa, otandyq kınoındýstrııany damytýǵa úlken múmkindik», deıdi «Almaty Film Festival» prezıdenti Aqan Sataev.