Meıram kúnderi elimizdiń ár óńirinde Ata Zańymyzdyń aıshyqty merekesine arnalǵan túrli deńgeıdegi is-sharalar saltanat qurdy. Arý qala Almatyda da Konstıtýsııa kúnine oraı merekelik kesh ótti. Respýblıka saraıynda shymyldyǵyn túrgen dýmannyń basty ereksheligi sol – tek qana ulttyq naqyshtaǵy mýzykalyq shyǵarmalar oryndalyp, megapolıstegi eleýli jetistikter saralandy.
Kesh shymyldyǵyn ashqan qala basshysy Baýyrjan Baıbek alǵashqy konstıtýsııa dál osy Almatyda qabyldanǵanyn atap ótti. Sondyqtan bul kúnniń Almatylyqtar úshin erekshe meıram ekenin jetkizgen ákim jınalǵan jurtshylyqty mereıli merekemen quttyqtady.
Respýblıka saraıyn lyq toltyrǵan kórermender tamyry tereńde jatqan halyq ánderimen sýsyndap, tipti keıbirin ónerpazdarmen qosyla shyrqady. Dombyra shanaǵynan tógilgen kúmbirlegen kúı ásem keshtiń ajaryn arttyra tústi. Sondaı-aq, kesh barysynda elimizdiń táýelsizdik jyldarynda júrip ótken san qıly jolynan syr shertetin arnaıy beınerolıkter de kórermen nazaryna usynyldy.
– Elimizdiń eń úlken merekesi – Konstıtýsııa kúni. Sanaýly jyldar ishinde jas memleketimiz úlken jetistikterge qol jetkizdi. Eń birinshi, bul úshin prezıdentimiz bastaǵan atqa qonǵan azamattarǵa rahmet. Memleket basshysynyń bastaýymen búgingi jetistik elimizdi damyǵan 30 eldiń qataryna ákele jatyr. Barlyq tabystar halqymyzdyń eńbegi, elimizge Táńirdiń bergen syıy, – deıdi Almaty qalalyq Qoǵamdyq Keńes múshesi Shmıt Ilıasov.
Jınalǵan qaýym aldynda qaladaǵy birqatar jetistikterge toqtalǵan Megapolıs basshysy Elbasynyń bastamasymen iske qosylǵan «7-20-25» baǵdarlamasy boıynsha Almatyda 5,1 mlrd. teńgege turǵyn úı nesıesiniń 36%-y berilgenin atap ótti. Onyń ústine elimizde usynylǵan 1,5 myń páterdiń 40% -y osy Almatyǵa tıesili. «Elbasynyń «Bes áleýmettik bastamasy» boıynsha taıaýdaǵy úsh jyl ishinde 37 jataqhana salynady. Qazirdiń ózinde 4 myń oryndy 7 nysannyń qurylysy bastaldy. Olardyń tórteýi bıylǵy jyly paıdalanýǵa beriledi. О́z kezeginde «Nurly jer» memlekettik baǵdarlamasy qalada turǵyn úı salý deńgeıin 7,5%-ǵa deıin kóterdi. Bul osy jyldyń 7 aıy ishinde 1 mln. sharshy metrden astam úı salynǵanyn kórsetedi», dedi ol.
Aıta keterligi, «Almaty jastary» qalalyq turǵyn úı baǵdarlamasy boıynsha sońǵy eki jylda qala bıýdjetinen 3 mlrd. teńge bólingen. О́tken jyly 100-den astam jas otbasy jeńildetilgen jaǵdaıda páter alǵan bolsa, bıylǵy jyly bul kórsetkish eki esege ulǵaımaq.
Arman OKTIаBR,
«Egemen Qazaqstan»
ALMATY