Elbasynyń Jańaózende bolyp, qala turǵyndarymen kezdesýi, búlik pen jappaı tártipsizdiktiń saldarynan búlingen ǵımarattardy shuǵyl qalpyna keltirý jóninde Úkimet pen tıisti vedomstvolarǵa tapsyrma bergeni úlken parasattylyqtyń belgisi dep bilemiz. Memleket basshysynyń osynaý arnaıy issapary týraly aıtqan kezde elimizdiń kez kelgen óńirinde oryn alǵan keleńsiz jaǵdaı, ár otbasynyń basynda kezdesetin qaıǵy-qasiret eń aldymen Nursultan Ábishulynyń júregin tilip ótetinin sezingendeı kóńil-kúıge bólenemiz.
Eldegi qarapaıym adamdardyń taǵdyry men muń-muqtajy únemi Elbasy nazarynda turatynyna bul joly taǵy da kýá bolyp otyrmyz. Bul pikirimizdiń bir dáleli retinde Prezıdent Jańaózen aýmaǵynda jumystan qysqartylǵan nemese bosatylǵan jumysshylardy ındýstrııalyq-ınnovasııalyq baǵdarlama sheńberine kiretin kez kelgen joba nysandaryna ornalastyrý jóninde bergen pármeni aıǵaq.
Árıne, munaıly túbekte eńbek daýlary jónindegi áńgime birazdan beri aıtylyp keledi. Áıtse de osy eńbek daýlary men Jańaózendegi jappaı tártip buzýshylyq arasynda eshqandaı baılanys joq ekenin taǵy da ashyp aıtqan oryndy. Eńbek daýlary jóninde Prezıdenttiń tapsyrmasy bolǵan eken. Ony der kezinde oryndamaı ózekti máseleni sheshýde dármensizdik tanytqandar, ulttyq kompanııa men onyń enshiles qurylymdarynyń basshylary arasynda menedjment tıimdiligin jolǵa qoıa bilmeıtin kezdeısoq adamdardyń bolýy Elbasyn el aldynda yńǵaısyz jaǵdaıǵa túsire jazdaǵanyn qaıda qoıamyz?
Bulardyń qatarynda Úkimet, «Samuryq-Qazyna» ál-aýqat qory, «QazMunaıGaz» kompanııasy bolǵany qandaı ókinishti. Nursultan Ábishuly solardyń barlyǵynyń attaryn atap, tústerin tústep aıtyp, bul olqylyqty sheshý jóninde shuǵyl shara belgilep, oń kadrlyq ózgerister jasaǵany da barsha qazaqstandyqtardyń kóńilinen shyǵyp otyr.
Bir sózben aıtqanda, Ult kóshbasshysynyń basty ustanymy qaı kezde, qandaı jaǵdaıda da tek aqıqattan attamaý ekenin taǵy da tereńirek túısinip otyrmyz.
Qazybaı BOZYMOV, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń rektory.
Batys Qazaqstan oblysy.