Áleýmettik medısınalyq saqtandyrý qorynyń Astana qalasy boıynsha fılıaly jyl basynan beri joǵary tehnologııalyq medısınalyq qyzmetter úshin 13,3 mlrd teńge tóledi. Tólem kólemi atalǵan qyzmetterdi kórsetetin astanalyq medısına qyzmetterin jetkizýshilerdiń jyldyq qarjylandyrý josparynyń 61%-in quraıdy.
Stasıonarlyq jáne stasıonaralmastyrýshy JTMQ pasıentter úshin jergilikti jáne respýblıkalyq deńgeıdegi medısınalyq mekemelerde usynylady. Bul qyzmetter kepildendirilgen tegin medısınalyq qyzmetter kólemine kiredi. Osylaısha, eger adam syrqattanyp qalǵan jaǵdaıda, qymbat turatyn tehnologııalyq dıagnostıka men emdi qajet etetin bolsa, onda ol turǵylyqty jerine qaramastan memleket esebinen kerek medısınalyq kómekti ala alady.
Kvota – memleket esebinen qymbat prosedýralardy, jabdyqtar men basqa da medısınalyq kómekti qoldanýdy qajet etetin dıagnostıka men emge kepil beretin qujat. Joǵary tehnologııalyq medısınalyq qyzmet sheńberinde kóptegen kúrdeli estý qabiletin jaqsartatyn operasııalar, kohlearly ımplantasııa, transplantologııalyq operasııalar, laparoskopııalyq jáne mıkrohırýrgııalyq operasııalar, býyndardy almastyrý, kardıohırýrgııalyq operasııalar jáne taǵy da basqalary jasalady, – dedi ÁMSQ Astana qalasy boıynsha fılıaly dırektorynyń orynbasary A.Amangeldıev.
Kvota boıynsha aýrýhanaǵa jatqyzý josparly túrde jasalady. Joǵary tehnologııalyq medısınalyq qyzmetterdi kórsetýge joldamany jergilikti deńgeıdegi emhananyń nemese aýrýhananyń mamany beredi. Joldama gospıtalızasııalar bıýrosynyń portalynda naýqastyń tańdaǵan medısınalyq uıymyn esepke ala otyryp tirkeledi. Eger de jergilikti jerde JTMQ-pen qamtamasyz etý múmkindigi bolmasa, onda naýqasty josparly túrde aýrýhanaǵa jatqyzý máselesin respýblıkalyq deńgeıdegi komıssııa qarastyrady.
– Kvota alý úshin naýqas aldymen turǵylyqty jerindegi ýchaskelik dárigerge júginýi kerek. Sodan keıin ol salalyq mamandardyń qabyldanýyna barady. Konsýltasııa men saraptamadan ótkennen keıin pasıent nusqaý boıynsha stasıonarlyq emge jiberiledi. Naýqastyń joldamasy portalǵa tirkeledi, naýqasty aýrýhanaǵa jatqyzý kúni qosymsha habarlanady, – dep túsindirdi A.Amangeldıev.
MÁMS biryńǵaı ulttyq densaýlyq saqtaý júıesiniń bóligi jáne eki negizgi qaǵıdany qamtamasyz etýge arnalǵan: pasıentke medısınalyq uıymdy erkin tańdaý múmkindigin berý jáne josparly gospıtalızasııa kezinde usynylatyn medısınalyq qyzmettermen qamtamasyz etý. Esterińizge sala keteıik, mindetti medısınalyq saqtandyrý júıesin engizý 2020 jylǵa deıin shegerildi.
«Egemen-aqparat»