Búgin Qytaı Halyq Respýblıkasynyń shyǵysynda ornalasqan Jýdýn qalasynda «Motorǵa gaz» atty tabıǵı gazben júretin tehnıkanyń eń uzaq halyqaralyq avtosherýi bastaldy. Is-shara Qytaıdyń, Qazaqstan men Reseıdiń iri energetıkalyq kompanııalary– «SNPC», «QazMunaıGaz» UK AQ jáne «Gazprom» AAQ-nyń qatysýymen uıymdastyryldy.
Bul, gazdy-motorly otynmen júretin kólikterdiń avtojarysy tarıhyndaǵy eń úlken jarys, uzyndyǵy 9 881 shaqyrymdy quraıdy. Buǵan qosa onyń eleýli bóligi «Batys Eýropa – Batys Qytaı» jańa halyqaralyq kólik dálizi baǵyty boıynsha Qazaqstan Respýblıkasynyń aýmaǵy arqyly ótedi. Qytaı, Qazaqstan jáne Reseı aýmaǵyndaǵy avtosherý baǵyty: Jýdýn, Sýsıan, Chjenchjoý, Sıan, Dınsı, Ýveı, Szıaıýıgýan, Hamı, Turfan, Ýsý, Qorǵas (Qytaı), Almaty, Taraz, Túrkistan, Qyzylorda, Aral, Aqtobe (Qazaqstan), Orynbor, Almetevsk, Qazan, Nıjnıı Novgorod, Vladımır, Torjok jáne Sankt-Peterbýrg (Reseı) qalalary arqyly ótedi.
Jarystyń qazaqstandyq bóliginde kólikterge gaz toltyrýdy ulttyq gaz operatory «QazTransGaz» AQ qamtamasyz etetin bolady. Jarysqa qatysýshylar 4 qazanda VIII Peterbýrg halyqaralyq gaz forýmynyń ashylýy sheńberinde Sankt-Peterbýrg qalasynda márege jetýdi josparlady.
Jarystyń saltanatty ashylý rásiminde sóz sóılegen «QazTransGaz» AQ Bas dırektory Rýstam Sýleımanov, osy avtosherýdi ótkizý tabıǵı gazdy ekologııalyq taza jáne únemdi motorlyq otyn retinde paıdalanýdy nasıhattaý úshin shynaıy múmkindik ekendigin aıtty.
«Qazir Qazaqstanda kóliktik sektordy jańǵyrtý jáne ony dızeldi otynnan tabıǵı gazǵa aýystyrý máselesi pysyqtalýda» - dedi Rýstam Sýleımanov. - 2022 jylǵa kóliktik sektordyń tabıǵı gazdy tutynýyn on esege ulǵaıtý boljanyp otyr. Bul úshin avtomatty jáne krıogendi gaz toltyrý stansııalary jelilerin keńeıtý jobalary iske asyrylatyn bolady. Osy kórsetkishterge qol jetkizý zııandy shyǵaryndylardyń azaııýyna, jumys oryndarynyń ulǵaıýyna jáne otyn shyǵyndaýdy orasan únemdeýge eleýli áser etedi».
Avtojarys kolonnasy suıytylǵan jáne syǵymdalǵan tabıǵı gazben jumys isteıtin 17 júk jáne jeńil avtomobılder men avtobýstardan turady. «QazTransGaz» AQ osy is-shara sheńberinde «Batys Eýropa – Batys Qytaı» tarnskontınentaldyq kólik baǵytynyń qazaqstandyq ýchaskesinde perspektıvaly gaz toltyrý ınfraqurylymynyń lokasııasyn aıqyndaý mindetin qoıyp otyr. Budan bólek, avtojarys tabıǵı gazdy dástúrli otyn túrleri arasynda motorly otyn retinde paıdalaný artyqshylyǵyn kórsetýdi kózdeıdi.
Elimizde gazdy motor otyny retinde qoldanýdy damytý jáne avtogaz quıý beketterin salý isimen «QazTransGaz» AQ enshiles kásiporny «KazTransGaz О́nimderi» JShS aınalysýda.
"QazTransGaz" AQ – Qazaqstannyń gaz jáne gazben jabdyqtaý salasyndaǵy ulttyq operatory. «QazTransGaz» AQ kompanııalar tobynyń quramyna gaz jáne ony óńdeý ónimderin óndiretin, tasymaldaıtyn jáne ótkizetin kásiporyndar men uıymdar kiredi.