Memleket basshysy Nursultan Nazarbaevtyń atyna Qazaqstan Táýelsizdiginiń 20 jyldyq mereıtoıyna baılanysty quttyqtaý hattary men jedelhattar legi tolassyz kelýde, dep habarlady Qazaqstan Respýblıkasy Prezıdentiniń baspasóz qyzmeti.
Avtorlardyń arasynda ulttyq kompanııalardyń, kásiporyndar men mekemelerdiń, ártúrli oqý oryndarynyń eńbek ujymdary, etnomádenı birlestikter men qoǵamdyq uıymdardyń jetekshileri, mádenıet pen ǵylym qaıratkerleri, kásipkerler, ardagerler, elimizdiń jurtshylyq ókilderi men jekelegen qazaqstandyqtar bar.
Elimizdiń Prezıdenti men Qazaqstan halqyn álemniń barlyq elderinen memleket jáne úkimet basshylary, halyqaralyq uıymdardyń jetekshileri, álemge belgili saıasatkerler, ǵalymdar, bıznesmender, taıaý jáne alys shet elderdiń qarapaıym azamattary quttyqtady.
Quttyqtaý hattarynda Qazaqstannyń 20 jyl aralyǵyndaǵy táýelsiz damýynda qol jetkizgen zor jetistikteri aıtylyp, Prezıdent Nursultan Nazarbaevtyń táýelsiz Qazaqstandy qurýdaǵy jáne tabysty damytýdaǵy, óńirde beıbitshilik pen turaqtylyqty, sondaı-aq jahandyq qaýipsizdikti nyǵaıtýdaǵy tarıhı róli atap kórsetilgen.
Memleket basshysy Nursultan Nazarbaev óz atyna kelip túsken quttyqtaýlarmen tanysyp, memleket jáne halyqaralyq uıymdardyń barlyq basshylaryna, Qazaqstannyń sheteldegi dostaryna jáne barsha qazaqstandyqtarǵa olardyń joǵary baǵasy, júrekjardy quttyqtaýlary men Qazaqstan halqyna amandyq tilegen ıgi tilekteri úshin sheksiz rızashylyǵyn bildiredi.