«Rýhanı jańǵyrý» baǵdarlamasy aıasynda qazaq, orys jáne aǵylshyn tilinde 21 kitap shyqty

Atap aıtqanda, fılologııa ǵylymdary­nyń doktory, professor Tynysbek Qońyrat­baıdyń «Qazaq eposynyń etnıka­lyq sıpaty» atty monografııasynda epos janrynyń ult tabıǵaty, psıhologııasy, ádet-ǵurpy, salt-sanasymen baılanysy jan-jaqty qarastyrylǵan. Sonymen qatar eńbekte qazaq ádebıetindegi mol epos­tyq muranyń tanymdyq sıpaty ult tarıhy­men baılanysty keńinen sıpattalǵan.

Áleýmettik-gýmanıtarlyq fakýl­tetiniń oqytýshylary Rahııa Dármenova, Marat Turǵymbaı jáne Bıbigúl О́tegenova­nyń avtorlyǵymen jaryq kórgen «Sándik qoldanbaly óner» atty oqý quraly sándik qoldanbaly ónerdiń tarıhı jáne teorııa­lyq damý úrdisi jóninde tereńirek bilim alyp, kórkem shyǵarmany taldaýǵa, ol týraly óz pikirin saýatty jetkize bilýge úıretedi. Kitap rýhanı mádenıetimizdegi asyl muramyzdy zerdeleýge, kórkemdik tárbıeni nasıhattaýǵa jol ashady.

Túrki halyqtarynyń maqal-mátelderi men sheshendik sóz órnekteri jáne onyń qazirgi zamanmen rýhanı sabaqtastyǵy Qazaq fılologııasy jáne álem tilderi fakýl­tetiniń professory Bolathan Sar­basovtyń «Ejelgi dáýir jáne túrki halyq­tary ádebıeti» atty oqý quralynda zerde­lengen. Sondaı-aq kitapta túrki eskert­kishterindegi folklorlyq obrazdar men motıvter de anyqtalǵan.

Babalarymyz matematıka, astronomııa, fızıka, jaratylystaný salalaryn jetik bilgen, baıyrǵy zamanda qazaq halqynyń oqý-bilimge qushtar bolyp qana qoımaı, ózindik ólshemder men mate­­ma­tı­kalyq ádis-tásilderdi oılap tapqa­n. Bul týraly Fızıka-mate­ma­tıka fakýl­teti­niń oqytýshysy Sovetbaı Elý­baev­tyń «Qazaqtyń baıyrǵy qara esepteri» atty oqý quralynda keńinen qamtylǵan.

«Jahandyq zamanaýı qazaqstandyq mádenıet» atty monografııada Qazaq fı­lo­logııasy jáne álem tilderi fakýl­tetiniń oqy­týshysy Saǵıra Odanova mem­le­­ket­­tik til­diń kommýnıkatıvtik qury­ly­­myn­­­daǵy óz­geris­terdiń konseptýaldy má­se­­le­lerine mán bergen. Sondaı-aq kitap­ta qazaq tili de álem­degi basqa tilder sııa­qty damı­tyn, qoǵamm­en birge tynystaı­tyn, jań­ǵyrýǵa beıim tiri aǵza retinde qarastyrylǵan.

Pedagogıka-psıhologııa fakýltetiniń oqytýshylary Sholpan Taýbaeva, Gúlnar Muratbaeva jáne Saıra Jıenbaevanyń avtorlyǵymen shyqqan «Pedagogıkalyq zertteýlerdiń ádisnamasy men ádistemesi» oqýlyǵynda qazirgi zaman bilimgeri úshin qajetti pedagogıkalyq zertteýlerdi júr­gizý men uıymdastyrýdyń ádisteri, zamanaýı zertteý quraldaryn tıimdi qoldaný, pedagogıkalyq zertteýdiń sapasyn zertteý ólshemderi jáne ádis-tásilderi keńinen sóz bolady.

Sondaı-aq «Týǵan jer» baǵdarla­ma­sy aıa­synda ýnıversıtet oqytýshysy M.Qana­bekovanyń qosalqy avtorlyǵymen «Qasıetti Qazaqstan» ensıklopedııasynyń 1 tomy, Jaratylystaný fakýltetiniń professory K.Mamyrova men E.Tólegenovtiń «Qoldanbaly geografııa», Áleýmettik-gýmanıtarlyq fakýltetiniń dosentteri Jamal Áshirbekova men Erdáýlet Berlibaev­tyń «Otan tarıhynyń tarıhnamasy men derektemesi», oqytýshylar L. Ádilbekovanyń «HH ǵasyrdaǵy qazaq ádebıetiniń tarıhy (1900 – 1940 jj.)», A. Jubandyqovanyń «Bastaýysh synyp oqýshylarynyń ólketaný is-áreketine qundylyq baǵdaryn qalyptastyrýdyń ǵylymı negizderi», S. Odanovanyń «The law of conservation in the Kazakh language», «Fılosofııa ı metodologııa pedagogıkı» jáne G. Danııarovanyń «Let’s develop reading and speaking skills» atty oqý quraldary shyqty.

Jandar ASAN,

Qyzdar ýnıversıtetiniń baspasóz jáne qoǵammen baılanys bóliminiń basshysy