Astanadaǵy Ortalyq kommýnıkasııalar qyzmetinde «Qazaqstan» RTRK AQ basqarma tóraǵasy Erlan Qarın men «Qazsport» telearnasynyń dırektory Pavel Sybýlınniń qatysýymen ««Qazaqstan» jáne «Qazsport» telearnalarynda UFC jekpe-jekterin kórsetý quqyǵyna ıe boldy» taqyrybynda baspasóz máslıhaty ótti.
Erlan Qarınniń aıtýynsha: «Qazaqstan» teleradıokorporasııasy búkilálemdik UFC sport uıymynyń jekpe-jekterin Qazaqstan aýmaǵynda bir jarym jyl boıy kórsetý quqyǵyna ıe boldy.2018 jyldyń qyrkúıek pen jeltoqsan aılary aralyǵynda «Qazaqstan» jáne «Qazsport» telearnalarynda UFC-tiń 14 jekpe-jegi efırge shyǵady. Sonyń ishinde, 6 qazan kúni Las-Vegasta ótetin ırlandııalyq Konor MakGregor men reseılik Habıb Nýrmogomedovtyń arasynda ótetin UFC229 keshi de kórsetiletin bolady. Al, 2019 jyly 40-tan astam týrnırdiń kórsetilimi josparlanyp otyr. Jekpe-jek keshteriniń negizgi kórsetiliminen bólek, Qazaqstandaǵy belgili MMA mamandarynyń qatysýymen túrli stýdııalyq baǵdarlamalar men ataqty UFC sportshylary týraly arnaıy habarlar daıyndalady. Atalǵan kelisim-shart elimizde osy sport túriniń damýymen qatar, qazaqstandyq sportshylardyń halyqaralyq deńgeıde daıyndalýyna septigin tıgizetin bolady».
Ultimate Fighting Championship (UFC) - aralas jekpe-jek sportynda jyldam damyp kele jatqan sporttyq uıym. Bas keńesi AQSh-tyń Las-Vegas qalasynda ornalasqan. Búginde UFC-diń kez-kelgen jekpe-jek keshi álemniń túkpir-túkpirinen júzdegen telearnalar men mıllıondaǵan jankúıerlerdi jınaıtyn aýqymdy sharaǵa aınalǵan.
«Sondaı-aq, biz 16 qyrkúıek kúni barsha qazaqstandyqtar asyǵa kútip júrgen Golovkın men Alvares arasyndaǵy boks keshin kórsetetin bolamyz. Sonymen qatar, 20 qyrkúıekten bastap bizdiń arnalarymyzda «Qazaqstan FIGHTER» jobasynyń tusaýkeseri bolmaq. Bul jobada jas sportshylar «Aralas jekpe-jekten Qazaqstannyń eń myqty sportshysy» ataǵy úshin synǵa túsetin bolady. Jobanyń maqsaty - Qazaqstandaǵy aralas jekpe-jek sportyn damytý» ,- dedi Pavel Sybýlın.