Almatyda Jambyl atyndaǵy qalalyq jasóspirimder kitaphanasynda sý jańa týyndynyń tusaýy kesildi. Oqyrmanǵa esimi belgili jas jazýshy Arman Álmenbettiń qalamynan órilgen «Berekeli bıznestiń syry» atty jańa kitap qaırat qylyp, eńbek etýge talaptanǵan azamattardy arman bıigine talpyndyryp, talaı jastyń maqsat-jigerin shyńdaı túsetin taptyrmas týyndy dep ataýǵa bolady.
Jasyratyny joq bıznes taqyrybyn qamtyǵan qazaq tilindegi tanymdyq kitaptar búginde joqtyń qasy. Jazýshynyń qazirgi naryq zamanynda óte ózekti sanalatyn bul taqyrypqa erkin qalam terbeýi qazaq jastarynyń óz kásibin ashyp, jeke ispen aınalysýǵa degen qyzyǵýshylyǵynyń artqanyn baıqatady. Atynda aıtylyp turǵandaı kitaptyń bolmysy bıznes bastaýdyń qyry men syryna qanyqtyryp, bul salanyń qıyndyǵy men qyzyǵynan habar beredi. El Táýelsizdigimen birge bıznes bastaǵan Erlan Áshimniń kásiptegi jetistikterin, júrip ótken joldaryn, qurǵan kompanııalarynyń tarıhyn mysal ete otyryp, toqsanynshy jyldardaǵy qıyn kezeń, zamannyń ózgerýi, bıznestegi saýattylyq, batystyq bilim men qazaqy qundylyqtardyń toǵysýy turǵysynan mol derekke qanyqtyratyn shyǵarma kórkem ári túsinikti tilde jazylǵan.
Kitaptyń biz baıqaǵan basty artyqshylyǵy sol – kásipkerlikke bet alǵan oqyrmandardy oı tereńine tartyp, qandaı jetistikke jetseń de ulttyq bolmysyńnan, rýhanı qazynańnan ajyramaý máselesin alda ustap, ulttyq brend qalyptastyrý arqyly el mártebesin asqaqtatýǵa shaqyrady. Avtor ata-anaǵa degen erekshe qurmet, áke mektebi, baýyrmaldylyq, namys, tazalyq, tektilik, senim, obal, saýap, janashyrlyq, qazaqy ıntellekt, ultjandylyq, qarapaıymdylyq, qaıyrymdylyq, adaldyq syndy eń ıgi qasıetterdi saqtaı otyryp bastalǵan kásiptiń sharapaty mol, berekesi basym bolatynyn oqyrmanǵa uǵyndyrǵysy keledi. Rýhanı ári materıaldyq qundylyqtardyń tizginin teń ustaý adamdyqtyń adastyrmas kilti ekenin alǵa tartady.
– Kitap belgili kásipkerdiń bıznestegi asqan asýlary men attaǵan belesterinen syr shertedi. Bul eńbegimde kóptegen iskerlik kitaptar sııaqty qurǵaq teorııamen shektelýdi jón kórmedim. Tipti kitaptyń bas keıipkeri bıznes salasyndaǵy basty uǵymdar men teorııalardy bilmeı-aq eki kompanııa qurǵan. Qalaı deısizder ǵoı? Qazaqy tárbıe men ulttyq qundylyqtar arqyly. Oqyrman bul eńbegim arqyly bıznes jasaýdyń joldarymen tanysyp qana qoımaı, keıipkerimniń boıyndaǵy ultymyzdyń asyl qundylyqtaryna tánti bolsa deımin. Berekeli bıznes besiktegi tárbıeden bastalady. Memleket basshysy, kásipkerlerge eń aldymen halyqqa jaqsylyq jasańdar degen sózdi únemi aıtyp kele jatyr. Árbir isker azamat halyqshyl bolsa, ult muratyn basty orynǵa qoısa, bul naǵyz «Rýhanı jańǵyrý» bolar edi dep esepteımin, – deıdi avtor.
Kitaptaǵy kásipkerlikke qatysty túrli derekter, oı-pikirler jas talaptanýshylardyń ǵana emes, tájirıbeli kásipkerler men mamandardyń da kádesine jaraıdy dep senemiz.
Arman OKTIаBR,
«Egemen Qazaqstan»
ALMATY