Astanada jyl basynan beri 4 ana ólimi tirkelgen perzenthanadan bas dárigermen birge kóptegen dárigerler de ketpek bolǵan, dedi baspasóz máslıhatynda Densaýlyq saqtaý mınıstri Eljan Birtanov.
«Bas dárigerdiń jumystan bosatylýy týraly, meniń qolymda bar aqparat boıynsha ol jumystan ketý týraly ótinishti óz qolymen jazǵan. Nelikten bulaı etkeni de túsinikti. Shynyna kelgende, kóptegen dárigerler de jumystan ketkisi kelgen. Men ol ortalyqqa arnaıy baryp, dárigerlermen sóılesken edim. Bunyń óte úlken qysym ekeni belgili. Bári de qylmystyq jaýapkershilikten qorqady. Dárigerlerdiń tipti keıde negizsiz qylmystyq qýdalaýǵa ushyraǵan kezderi de bolǵan. Biz bul jaǵdaıǵa óte abaılap kelýimiz kerek. О́te shynaıy baǵa bere bilýimiz kerek. Sebebi, sot sheshimi shyqpaı turyp, negizsiz aıyptaý ókinishke qaraı perınataldyq ortalyqta eńbek etetin kásibı dárigerlerdiń júrekterin shaılyqtyryp jiberýi múmkin. Osydan keıin biz ondaı mamandardy tappaı, máseleni odan ary qıyndata túsemiz», - deıdi mınıstr.
Ol bul jaǵdaıda eń aldymen jergilikti atqarýshy organdar sheshim shyǵaratynyn atap ótti.
«Medısınalyq kómekti uıymdastyrý, densaýlyq saqtaý salasynyń memlekettik-kommýnaldyq nysandaryn basqarý, bas dárigerdi taǵaıyndaý nemese alyp tastaý bul jergilikti atqarýshy bıliktiń quzyretine jatady. Biz nelikten shtabtardyń jumysyn aýdan nemese qala ákimderdiń orynbasarlaryn jumyldyra otyryp júrgizemiz? Sebebi, bul tikeleı solardyń jumystary. Demek, biz emdeýdiń standarttaryn, hattalamalaryn, kadrdy beremiz, salany retteımiz, biraq tikeleı jergilikti atqarýshy organ belsendi túrde bul sharýamen aınalysýy kerek», - dedi mınıstr.
Aıta keteıik, Astanada 4 ana ólimi bolǵan perzenthananyń bas dárigeri qyzmetinen bosatylǵan.