Jetisý óńiriniń agralyq saladaǵy qolaıly múmkindigi men qol jetkizgen jetistigi álemniń damyǵan elderindegi jekelegen kásiporyndardyń qyzyǵýshylyǵyn týǵyzyp otyr.
Jalpy, aımaqqa ınvestısııa salýshylardyń qatary jyl saıyn kóbeıip, olardyń deni aýyl sharýashylyǵy ónerkásibi baǵytynda birlesip jumys isteýge beıil ekendikterin bildirgen. Ony sońǵy bir-eki jyl kóleminde oblys ekonomıkasyna quıylǵan shetel ınvestısııasynyń kólemine qarap baǵamdaýǵa bolady. Mysalǵa, 2017 jyly oblysqa 527 mlrd teńge ınvestısııa tartylyp, óńir respýblıka boıynsha alǵashqy tórttikke engen bolatyn. Iаǵnı, Almaty oblysynyń ınvestısııalyq tartymdylyǵy syrtqy naryqqa qarjy salýshylardyń yntasyn arttyrǵany anyq. Solardyń qatarynda ıtalııalyq Areas More kompanııasy da bar. Jaqynda Almaty oblysyna osy kompanııanyń prezıdenti Sılvııa Pessını arnaıy saparmen kelip, jergilikti kásipkerlermen kezdesti.
Areas More kompanııasy tek Italııa ǵana emes, kári qurlyq naryǵyndaǵy ózindik oryn bar iri saýda-sattyq ári óńdeýshi keshen retinde tanymal. Negizinen agroónerkásip taýarlaryn óńdeý, qaıta óńdeý ári satýmen aınalysady. Areas Moreniń saýda saıasatyndaǵy basty erekshelik retinde ashyq áriptestik pen teń seriktestik ustanýynda bolsa kerek. Qazirgi kezde kompanııanyń dúnıe júzi boıynsha iri 50 seriktesi jáne júzden asatyn áriptes kompanııasy bar eken. Sılvııa Pessınıdi Jetisý topyraǵyna osy úmit, Qazaqstan aýmaǵynan seriktes bolatyndaı yńǵaıly kásiporyn izdeý maqsaty jetelep kelse kerek. Italııa kásipkeriniń bul maqsaty oryndalǵandaı da. О́ıtkeni, Almaty oblysynyń kásipker palatasynda bolǵan ekijaqty kezdesýde birqatar kelisimniń basy ashylyp, yńǵaıly talaptar týrasynda sóz boldy.
Almaty oblystyq kásipkerler palatasy Isker áıelder keńesiniń jetekshisi Rımma Salyqovamen kezdesken Areas More kompanııanyń prezıdenti Sılvııa Pessını Jetisý jerinde aýyl sharýashylyǵy salasynyń jaqsy damyǵanyn tilge tıek etti. Bul sheteldik ınvestorlar úshin óte tartymdy jáne qaıtarymy mol bıznes kózi retinde qarjy salýǵa jol ashady. Osy kezdesýde Pessını hanym aımaqtaǵy bıznes – ahýalmen jiti tanysqannan keıin, óńirde birneshe óńdeý kásiporyndaryn salýǵa bel býǵanyn aıtty. Buıyrsa, bıyl Almaty oblysynyń aýmaǵynda agroónerkásip ónimderin óńdeıtin jáne qaıta óńdeıtin 5 shaǵyn zaýyt salynady. Birlesken kásiporyndardy ıtalııa tarapy tolyqtaı jabdyqtap, iske qosady. Al shıkizatpen qamtý, daıyn ónimdi jóneltý isimen jergilikti seriktes kompanııa aınalysady.
- Almaty oblysynyń aýmaǵynda óńdeýshi kásiporyn qurýǵa qol jetkizý biz úshin tıimdi joba bolyp otyr. Jalpy, Italııa tarapy Qazaqstannyń agrosektoryna ınvestısııa salýǵa múddeli. О́ıtkeni, eldiń aýly sharýashlyǵy salasynyń múmkindigi mol. Tabıǵı ónim alýǵa, ony óńdeýge suranys bar. Biz bul jaqta jańa baǵyttaǵy kásiporyndar ashyp, olardyń damýyna kóńil bólemiz. Italııa bankteri men qorlar bul jobalardy qarjylandyrýǵa daıyn. Ásirese, soıa, alma jáne basqa da aýyl sharýashylyǵy ónimderin qaıta óńdeý, sonymen birge agrotehnıkany shyǵarýǵa qyzyǵýshylyq joǵary, - deıdi Sılvııa Pessını.
Qalmahanbet MUQAMETQALI,
«Egemen Qazaqstan»
Almaty oblysy