Qazaqstan elshiliginiń bastamasymen M.Lomonosov atyndaǵy Máskeý memlekettik ýnıversıtetiniń (MMÝ) tarıh fakýltetinde 1941 jylǵy Máskeý túbindegi shaıqastyń 70 jyldyǵyna baılanysty «Qazaqstandyqtardyń Uly Otan soǵysyna qatysýy» degen taqyrypta dóńgelek ústel otyrysy uıymdastyryldy. Buǵan qazaqstandyq jáne reseılik ǵalymdar, saıasattanýshylar, dıplomattar, jýrnalıster qatysty.
Dóńgelek ústel otyrysyn ashqan elshiliktiń keńesshi ýákili Samat Ordabaev óz sózinde 1941-1945 jyldardaǵy Uly Otan soǵysynyń halyqtar sanasynda jaýyngerlik qaharmandyqtyń, jappaı erliktiń sımvoly bolyp qala beretinine, adamzat tarıhynda eshbir soǵys buǵan teńdese almaıtynyna, soǵan sáıkes Jeńis jolynyń da jeńil bolmaǵanyna nazar aýdardy. «Máskeý túbindegi urystardyń zor saıası ári tarıhı mańyzy boldy. Osy qantógisti shaıqastar fashısterdiń «jeńilmeıtin armııasy» týraly ańyzdy joqqa shyǵaryp, búkil keńes halqynyń ortaq jeńisine jol ashty. Sondyqtan atalmysh soǵys ótken kúnderimizdiń bólinbes bir bóligi retinde qasterli. Tarıhı derekter bul soǵysqa 1 mıllıonnan astam qazaqstandyqtardyń qatysqanyn, olardyń árbir ekinshisi qaza tapqanyn ne habarsyz ketkenin aıǵaqtaıdy», dedi ol.
Atalǵan basqosýda Reseı memlekettik gýmanıtarlyq ýnıversıtetiniń (RMGÝ) rektory, RǴA korrespondent-múshesi E.I.Pıvovar, MMÝ prorektory N.V.Semın, MMÝ tarıh fakýlteti dekanynyń ǵylym jónindegi orynbasary L.S.Leonova, Máskeý Bas muraǵat basqarmasynyń ǵylymı qyzmetkeri V.A.Arsybashev, «Tarıhı zerde» qory zertteý baǵdarlamalarynyń jetekshisi V.V.Sımındeı, RMGÝ dosenti I.E.Hanova, S.Toraıǵyrov atyndaǵy Pavlodar ýnıversıtetiniń professory R.M.Tashtemhanova, MMÝ tarıh fakýlteti dekanynyń orynbasary A.V.Vlasov jáne basqalar pikir bildirdi.
Otandyq tarıhtyń osynaý ortaq taqyryby tóńireginde oı bólisip, Máskeý túbindegi urystarda erligimen tanylǵan qazaqstandyqtardyń qaharmandyǵy jaıynda sóz qozǵaǵan dóńgelek ústelge qatysýshylar Qazaqstan elshiliginiń otandastarynyń soǵys jyldaryndaǵy erligin máńgi este qaldyrý baǵytynda júzege asyrǵan jobalaryna iltıpat bildirdi. Sondaı-aq Keńes Odaǵyn mekendegen júzdegen ulttardyń soǵys jyldarynda shyńdalǵan dostyǵyn búgingi urpaqtyń sanasyna jetkizý, olardy osy rýhta tárbıeleý jáne ortaq tarıhı zerde keńistigin nyǵaıta túsý qajettigine nazar aýdaryldy.
Serikqalı BAIMENShE
MÁSKEÝ