Qazaqtyń kórnekti kompozıtory Ilıa Jaqanovtyń «Edil men Jaıyq» ánin bilmeıtin, onyń ásem áýenine eltimeıtin jan kem de kem shyǵar. Saǵynysh pen muńǵa, otanshyldyq sezimge toly, eldik pen órlikke, týǵan jerdi sheksiz súıe bilýge úndeıtin bul tamasha ánniń sózin jazǵan Memlekettik syılyqtyń laýreaty, aqyn Juban Moldaǵalıev. Osynaý óshpes óner týyndysynyń ómirge kelgenine bıyl otyz jyl tolyp otyr.
Osy dataǵa baılanysty Atyraý men Batys Qazaqstan oblystarynyń túıisken tusynda, atalǵan eki óńirdi jalǵastyratyn kúre joldyń boıynda eńseli de bıik banner qoıyldy. Aqjaıyq aýdanynyń ortalyǵy Chapaev kentinde de dál osyndaı banner ornatyldy.
Sóıtip, egemen Qazaqstannyń jıyrma jyldyq tarıhynda tuńǵysh ret adamǵa emes, ánge eskertkish qoıyldy. Munyń mánisi de óte qarapaıym deýge bolady. О́ıtkeni, «Edil men Jaıyq» áninde tutastaı qazaq eline degen tereń tolǵanysty sezim, ata-baba amanattaryna adaldyq saryny bar. Osy týyndydaǵy asqaq ta aryndy azamattyq áýen – egemendik pen eldikke úndeýdiń jarqyn kórinisi ispettes.
Qazaqtyń keń dalasy men aıdyny shalqyǵan ózenine arnalǵan án men onyń mátini egemendiktiń qadyr-qasıetin odan ári tereń zerdeleı túsýge qyzmet eteri kámil. Táýelsizdiktiń jıyrma jyldyǵy qarsańynda halqymyzdyń rýhyn kóterýge septigin tıgize alatyn óner týyndysyna eskertkish qoıylýynyń osyndaı sımfolıkalyq máni bar dep bilemiz.
Temir QUSAIYN,
ORAL – ATYRAÝ – ORAL.