Memleket basshysy Nursultan Nazarbaev Qaraǵandy óńirine jumys saparynyń ekinshi kúni jas jubaılardyń neke qııý rásimi ótip jatqan jańa «Aq saraı» saltanat saraıyna bardy. Qazaqstan Prezıdenti jas otaý ıelerin quttyqtap, olarǵa baqyt, shańyraqtaryna bereke tiledi.
– Erteń Qazaqstanda Otbasy kúni atalyp ótedi. Kóp adam úshin baqyt degenimiz – otbasy jáne balalary. Sizderdi ómirlerińizdegi eń jarqyn oqıǵamen quttyqtaımyn! – dedi Qazaqstan Respýblıkasynyń Prezıdenti Nursultan Nazarbaev.
Memleket basshysy otbasy ınstıtýtyn nyǵaıtýdyń jáne elimizdiń jas urpaǵyn tárbıeleýdiń mańyzdylyǵyn atap ótti.
Jas shańyraq ıeleri Qazaqstan Prezıdentine jas otbasylardy qoldaý baǵytynda júrgizilip jatqan saıasaty úshin, sonyń ishinde «7 – 20 – 25» baǵdarlamasy úshin alǵys bildirdi.
Jańa saltanat saraıy «Rýhanı jańǵyrý» baǵdarlamasy aıasynda jeke kásipkerdiń qarajatyna salynǵan.
Qazaqstan Prezıdenti sondaı-aq «ArselorMıttal Temirtaý» aksıonerlik qoǵamyna bardy. Nursultan Nazarbaev qara metall prokatyn shyǵaratyn Qaraǵandy oblysyndaǵy iri kásiporyndardyń birin aralap kórdi. Elbasy surypty prokat óndirý tehnologııasymen jáne metallýrgııa kombınatyn odan ári damytý josparymen tanysty.
Sonymen qatar Memleket basshysyna JEO-1 jáne JEO-2 kásiporyndaryn qaıta jóndeý jospary, sondaı-aq óńirdiń ekologııalyq qaýipsizdigin qamtamasyz etýge qatysty sheshimderi týraly baıandaldy.
Elbasy kásiporyn eńbekkerlerimen kezdesip, áńgimelesti.
– Qazir zaýyt aýmaǵynda meni erekshe bir sezim baýrap aldy. Munda alǵash ret 1958 jyly kirgen edim. Ol kezde bul jerde eshteńe bolǵan joq. Barlyǵy meniń kóz aldymda salyndy, – dep eske aldy Qazaqstan Prezıdenti.
Nursultan Nazarbaev kombınat metallýrgteri men eńbekkerleriniń jumysy aýyr ekenin atap ótip, Temirtaý qalasy men zaýyttyń ahýalyn únemi óz baqylaýynda ustaıtynyn aıtty.
Áńgime barysynda Elbasy kompanııa basshylyǵyna qala turǵyndarynyń turmysyn jaqsartý úshin bıznestiń áleýmettik jaýapkershiligi zor ekenin eskertti. Atap aıtqanda, Memleket basshysy qalada medısınalyq, bilim berý jáne sport nysandarynyń sanyn kóbeıtý qajettigin atap ótti.
Zaýyttyń eńbek ujymy ókilderi Qazaqstan Prezıdentiniń bastamalaryna jáne elimizde júzege asyrylyp jatqan memlekettik baǵdarlamalarǵa qoldaý bildiretinderin jetkizdi.
Nursultan Nazarbaev Qaraǵandyǵa jumys saparynyń sońynda Temirtaý qalasyndaǵy mádenıet jáne demalys saıabaǵyn aralap kórdi.
Onda Elbasy «Rýhanı jańǵyrý» baǵdarlamasy aıasynda júrgizilgen qaıta jóndeý jumystarynyń nátıjelerimen tanysty.
Memleket basshysy bıýdjetten tys qarajat esebinen saıabaq aýmaǵynda salynǵan nysandardy aralap kórdi. Sonymen qatar Nursultan Nazarbaev saıabaqta qalanyń ótken ǵasyrdyń 50-60-jyldaryndaǵy tarıhyn beıneleıtin teatrlandyrylǵan qoıylymdy tamashalady.
Sondaı-aq Qazaqstan Prezıdenti óz zamandastarymen jáne metallýrgııa kombınatynda birge jumys istegen burynǵy áriptesterimen júzdesip, áńgimelesti.
Qaırat Ábilda, «Egemen Qazaqstan» Qaraǵandy oblysy