Qostanaıda úzdikter men talanttardy oblys jastarynyń «Altyn kitabyna tirkeý» dástúri jalǵasyp keledi. Bıyl Rýdnyı qalasyndaǵy «Gornıak» mádenı-demalys saraıynda juldyzdy jastardyń kezdesýi jetinshi ret ótkizildi. Onda oblys ákimi Sergeı Kýlagın jastarǵa «Altyn kitapqa» engeni týraly sertıfıkat pen syılyqtar tapsyrdy. Saltanatty kezdesýge «Qostanaı oblysy jastarynyń altyn kitabynyń» 2005-2011 jyldar arasyndaǵy laýreattary, aýyl jastarynyń, úkimettik emes uıymdardyń ókilderi qatysty.
О́tken jyly 117 jastyń esimi altyn sııamen jazylǵan «Qostanaı oblysy jastarynyń altyn kitaby» albomy oblystyq tarıhı-ólketaný mýzeıine saltanatty túrde tapsyrylǵan bolatyn.Bıyl ómirdiń barlyq salasyndaǵy úzdik jastardyń esimi jazylatyn osyndaı albomnyń jańa beti ashyldy. Jańa albomǵa esimi jazylǵan on úsh jastyń arasynda aǵyp bara jatqan adamda sýdan qutqarǵan erjúrekter de,medısına salasyna ınnovasııalyq jańalyq engizgen dáriger, ǵalymdar, oqý úzdikteri, talantty ónerpaz jastar bar. Mysaly Oblystyq jol polısııasynyń qyzmetkeri Dáýlet Tileýkenov ústimizdegi jyldyń mamyr aıynda Tobyl ózenindegi kópirden sýǵa qulap ketken adamdy áriptesimen birge sýdan qutqaryp, oǵan alǵashqy medısınalyq kómek kórsetip, ajaldan aman qaldy. Osy erlik isi úshin Dáýlet Ishki ister mınıstriniń buıryǵymen «Quqyq tártibin qamtamasyz etýde úzdik shyqqany úshin» medalimen marapattaldy. Dáýlettiń esimi «Altyn kitapqa» engenimen ózi saltanatty keshke kele almady. Ol Jańaózendegi jaǵdaıdy qalypqa keltirýge kómektesý úshin issaparmen Mańǵystaý oblysyna júrip ketken bolatyn.
Rýdnyı qalalyq aýrýhanasynda anestezıolog dáriger bolyp isteıtin Vladımır Panchenko ólim men ómir jantalasqan sátte 750 adamdy ajal tyrnaǵynan aman alyp qaldy. Vladımır kúndelikti dárigerlik tájirıbesinde anestezıologııanyń ınnovasııalyq túrin engizip júr. Operasııa stolynda jatqan naýqas úshin anestezıologııanyń qaýipsiz jáne qolaıly túri neırostımýlıator apparatynyń arqasynda múmkin boldy. Vladımır qoldanysqa engizgen bul apparattyń oblysta áli teńdesi joq.
«Altyn kitapqa» esimi engen jastarǵa berilgen sertıfıkattyń nomeri belgilengen. Olar keıin mýzeıge tapsyrylyp otyratyn albomnan óziniń esimin kez kelgen ýaqytta osy nomer arqyly ońaı taýyp alatyn bolady.
Bıyl «Jastardyń altyn kitaby» sharalary tek oblysta ǵana emes, aýdandarda da óte bastady. Bul dástúrdi Taran, Álıekól aýdany jáne Arqalyq qalasynyń jastary jalǵastyrdy. Ár aýdannyń, tipti ár aýyldyń óz juldyzdary bolady. Áńgime olardyń qurbylaryna jaqsy úlgisinde, eliniń patrıoty bolýynda. Juldyzdy jastar barda elimizdiń bolashaǵy da jarqyn.
Názıra JÁRIMBETOVA
QOSTANAI