Qazaqstan Musylmandary dinı basqarmasy «Ýaqyp» qaıyrymdylyq qorymen birlese 2018 jańa oqý jyly qarsańynda elimiz boıynsha 20 248 balaǵa mektep sómkesin úlestirdi. Oqý quraldary salynǵan sómke meshitke ótinish bildirgen otbasylar men jergilikti ákimdiktiń usynǵan tizimi boıynsha áleýmettik az qamtylǵan otbasylarǵa taratyldy.
Astanadaǵy «Áziret Sultan» meshitinde ótken qaıyrymdylyq aksııasyna Bas múftı Serikbaı qajy Oraz qatysty. Oqýshylardy jańa oqý jylymen quttyqtap, balalarǵa arnalǵan syılyqty óz qolymen tabystady.
«Bizdiń halqymyz: «Berseń, balaǵa ber», degen. Balanyń qýanyshy – bárinen qymbat. Jańa oqý jylynda oqýshylarǵa syılyq úlestirý – Dinı basqarmanyń jyl saıynǵy dástúrli jobasy. Bala – el bolashaǵy. Bolashaǵyn oılaǵan el balanyń bilimi men tárbıesine mán beredi», dep atap ótti QMDB tóraǵasy, Bas múftı Serikbaı Satybaldyuly.
Qaıyrymdylyq – QMDB-nyń negizgi maqsattarynyń biri. Aıta keteıik, jýyrda Qazaqstan musylmandary dinı basqarmasy qurban aıt kúnderi (21-23 tamyz, 2018 jyl) elimiz boıynsha 61 191 otbasyna 439 tonna qurbandyq shalynyp, etin úlestirdi.
«Egemen-aqparat»