Qyzyljar óńirinde el táýelsizdiginiń 27 jyly ishinde tuńǵysh ret tirkelgen aıtýly oqıǵalardyń birine Andreı men Svetlananyń birden tórt qyz balanyń ata-anasy atanýyn jatqyzýǵa bolady. Otbasy ıeleri on jyl boıy bir sábı súıýdi armandap, baqytqa keneler qýanyshty kezdi zaryǵa kútip júrgende Masha, Katıa, Lıza,Tonıa esimdi úıelmendi-súıelmendi shaqalaqtar dúnıe esigin ińgálap ashqan. Qyzyljar aýdanynyń ortalyǵy Beskól kentinde turatyn qarapaıym otbasyna oblystyq ishki ister departamenti úsh bólmeli páterdi syıǵa tartyp, basqa da jón-joralǵylaryn jasaǵan. Budan bólek jergilikti «Urpaq» qory arqyly nárestelerge depozıt ashylyp, 150 aılyq eseptik kórsetkish kóleminde qarjy salynǵan.
Jetige kelgenshe jerden taıaq jep ósken sábıler bıyl mektep tabyldyryǵyn attap, partaǵa otyrdy. Shákirt atanyp, alǵashqy qońyraý soǵý mártebesine ıe boldy. Qazir ózi qatarlas 19 qurbysymen birge ustazdarynyń aldynan tálim-tárbıe alyp júr.
– Tórteýiniń minezi árqıly bolǵanymen, bári de zeıindi, sabaqqa alǵyr. Qazaqsha da, oryssha da júzge deıin jańylmaı sanaıdy,–deıdi synyp jetekshisi Evgenııa Sombareskaıa. Analary Svetlananyń aıtýynsha balabaqshaǵa barǵan kúnnen bastap án aıtýǵa, bı bıleýge mashyqtanǵan. Keıin bul qabiletterin ári qaraı damytyp, túrli mádenı keshterge belsene qatysatyn bolǵan.
Andreı OIID-niń qyzmetkeri, Svetlana satýshy. Aldaǵy ýaqytta «Mereıli otbasy» baıqaýyna qatyspaq oılary bar. Oǵan daıyndyqty bastap ketipti. Departament basshylyǵy jyldaǵy dástúr izimen Ivanovtar otbasyna arnaıy kelip, tórtemge syı-sııapattaryn kórsetipti.
О́mir ESQALI,
«Egemen Qazaqstan»
Soltústik Qazaqstan oblysy,
Qyzyljar aýdany