Sandyqtaý aýdanynda tuńǵysh ret «The NOMADS» ekstremaldy realıtı-shoýynyń túsirilimi bastalady.
«Visit Aqmola» týrıstik aqparattyq ortalyǵynyń deregi boıynsha túsirilim Balqashın aýylynyń mańynda júzege asyrylmaq. Jumyrtqadaı jutynǵan aqshańqan kıiz úılerden turatyn shoq juldyzdaı shaǵyn aýyl salýdy josparlap otyr. Qazirgi kezde, bul jerde atalmysh shoýdy túsirý úshin arnaıy qalashyqtyń qurylysy bastalyp ta ketti. Jobany Aqparat jáne kommýnıkasııalar mınıstrliginiń qoldaýymen «Kazakh TV» jáne «Habar agenttigi» aksıonerlik qoǵamynyń tapsyrmasy boıynsha «Tengrı Plıýs IS» seriktestigi júzege asyrmaqshy. Jaqsy iske Aqmola oblysy men Sandyqtaý aýdanynyń ákimdikteri qoldaý bildirýde.
– Elimizde buryn-sońdy dál osyndaı aýqymdy joba bolǵan emes, – deıdi jobanyń avtory jáne bas prodıýsseri Elena Gomer. Bul televızııalyq jobaǵa ár elden jınalǵan eki komanda 5 mıllıon teńge aqshalaı syıaqyǵa talasatyn bolady. Jobanyń rejısseri máskeýlik Kırıll Kýzın. Jobaǵa sheteldik kez kelgen mamandyq ıesi qatysa alady. Joba júrgizýshileri qazaqstandyq bylǵary qolǵap sheberi, Olımpıada chempıony, «Astana Arlans» kásipqoı boks klýbynyń bas menedjeri Baqtııar Artaev jáne «Kazakh TV» telearnasynyń halyqaralyq aqparattar jáne aǵylshyn tilindegi jańalyqtary bóliminiń basshysy Lázzat Shataeva.
Jobany «Kazakh TV» telearnasynda qazaq, orys jáne aǵylshyn tilderinde 4 qurlyq, 118 el, 600 qonaqúıde 300 mıllıon kórermen kóredi dep josparlanǵan.
Baıqal BAIÁDIL,
«Egemen Qazaqstan»
Aqmola oblysy,
Sandyqtaý aýdany