Turǵyn úı máselesi qaı kezde de ózekti. «Úıi joqtyń, kúıi joq» degendeı, úı baspanasyz jannyń basty muńyna aınalady. Deı turǵanmen, búgingi tańda el turǵyndary úshin baspanaly bolýdyń múmkindikteri kóp. О́ńirlerde «Nurly jer» baǵdarlamasy arqyly birshama turǵyn úı keshenderi salynyp, el ıgiligine berildi. Kóptegen otbasy qonys toıyn toılap, qýanyshqa kenelip jatyr. Memlekettiń myńdaǵan azamattarǵa jasaǵan qamqorlyǵy men múmkindikteriniń nátıjesinde árbir azamat óz shańyraǵynyń ıesi atanyp, mereıi tasýda.
«О́z úıim – óleń tósegim» deıdi halqymyz. Baqyt shamy mańdaıyna buıyrǵan baspanaly azamattardyń qatary búginde Jambyl oblysynda da kóbeıip keledi. Jýyrda «Nurly jer» memlekettik baǵdarlamasy boıynsha Taraz qalasyndaǵy «Araı» alqabynan boı kótergen 80 páterlik bes qabatty turǵyn úı paıdalanýǵa berildi. Turǵyn úı páterleriniń kilti tolyq emes otbasylarǵa, jetim balalarǵa, Uly Otan soǵysynyń ardagerlerine, sonymen qatar uzaq jyldan beri kezekte turǵan bıýdjettik mekeme qyzmetkerlerine tabystaldy. Jambyl oblysy ákiminiń orynbasary Erkebulan Daýylbaevtyń aıtýynsha, bul baǵyttaǵy jumystar oblystyń barlyq eldi mekenderinde «Nurly jer» baǵdarlamasy aıasynda jáne jergilikti, sonymen qatar oblystyq bıýdjet esebinen jalǵasyn tabatyn bolady.
«Araı» alqabynan bir jarym jylda boı kótergen turǵyn úıdiń qurylys jumystaryna respýblıkalyq bıýdjet esebinen 614 mıllıon teńge jumsaldy. Turǵyn úıdiń jalpy aýmaǵy 5 myń sharshy metrdi quraıdy. Jańa turǵyn úıde 15 bir bólmeli, 30 eki bólmeli jáne 35 úsh bólmeli páter bar. Sonymen qatar barlyq páter zamanaýı úlgide jasaqtalǵan. Bir aıta keterligi, aǵymdaǵy jyldyń sońyna qaraı «Báıterek» shaǵyn aýdanynda jaldyq negizde paıdalanýǵa arnalǵan taǵy da 100 jáne 60 páterli eki turǵyn úıdiń qurylysy aıaqtalatyn bolady. Bul da talaı turǵynnyń baspanaly bolýyna múmkindik syılaıtyn jaǵdaı.
Jambyl oblystyq qurylys, jolaýshylar kóligi jáne avtomobıl joldary basqarmasynyń basshysy Ádilet Ahataev jyl sońyna deıin №15 shaǵyn aýdanda 800 páterlik 10 kópqabatty turǵyn úı qurylysynyń aıaqtalatynyn jetkizdi. Sonymen qatar 255 kottedjdik jeke turǵyn úı salyný ústinde. «О́ńirdegi jalpy turǵyn úı qurylysyna bıyl 7,2 mıllıard teńge qarastyrylǵan. Barlyǵy 1600-ge tarta otbasy qonys toıyn toılaıtyn bolady. Birinshi jartyjyldyqta Taraz, Qarataý jáne Jańatas qalalarynda alty turǵyn úı paıdalanýǵa berildi. О́tken jyly 397 myń sharshy metr turǵyn úı salynǵan bolsa, bıyl bul kórsetkish 430 myń sharshy metrge deıin jetip otyr», deıdi basqarma basshysy.
Salynyp bitken turǵyn úılerdi bólý memlekettik «7 – 20 – 25» baǵdarlamasy arqyly júzege asatyn bolady. Al Ulttyq banktiń Jambyl oblystyq fılıalynyń málimetinshe, osy ýaqytqa deıin óńirde «7 – 20 – 25» baǵdarlamasymen jalpy quny 92 mıllıon teńge bolatyn 10 ótinish qabyldanyp, 8 ótinish maquldanǵan eken. О́ńirde 23 myńǵa tarta azamat baspana kezeginde tur. Sonyń ishinde 16 myńnan astam azamat Taraz qalasynyń turǵyndary. Oblys ortalyǵyndaǵy qarqyndy qurylystyń nátıjesinde keleshekte «Nurly jer» memlekettik baǵdarlamasy arqyly barlyq kezekte turǵan turǵyndar baspanaly bola alady.
Keleshekte №15 shaǵyn aýdanda turǵyndar úshin Oqýshylar saraıy, Neke qııý saraıy, Halyqqa qyzmet kórsetý ortalyǵy jáne Saltanat saraıy sııaqty birqatar kóz tartatyn keshen boı kótermek. Atalǵan nysandardyń qurylysyn aıaqtaý kelesi jylǵa josparlanǵan.
Jyl basynan beri Taraz qalasynda jalpy kólemi 120 myń sharshy metrden astam turǵyn úı paıdalanýǵa berilgen bolsa, jyl sońyna deıin taǵy da 13 kópqabatty turǵyn úıdiń qurylysyn aıaqtaý josparlanýda. Demek, jyl sońynda «Nurly jer» baǵdarlamasy arqyly taǵy da biraz azamattar qonys toıyn toılaıtyn bolady.
Hamıt ESAMAN,
«Egemen Qazaqstan»
Jambyl oblysy