Ústel tennısshileriniń álemdik reıtıngi qaıta jańartyldy. «TOP-50» oıynshynyń qatarynda Qazaqstannyń jalǵyz ǵana ókili bar. Elimizdiń birneshe dúrkin chempıony, Rıo Olımpıadasyna qatysýshy jáne birqatar halyqaralyq týrnırlerde júlde alyp júrgen 21 jastaǵy Kırıll Gerasımenko úzdikter tiziminde 40-oryndy ıelendi.
Álemniń eń úzdik oıynshylary kóshin Qytaıdyń qos sańlaǵy – Fan Chjendýn men Sıýı Sın bastady. Búgingi tańda bul sportshylardyń dańqy dúrkirep tur. Atap aıtsaq, 21 jastaǵy Fan Chjendýn – álemniń tórt dúrkin chempıony jáne sol jarystyń úsh márte júldegeri. Álem kýbogyn úsh márte oljalap, 2014 jyly Inchhonda ótken Azııa oıyndarynda bir altyn men qos kúmis medaldi ıemdendi. 28 jastaǵy Sıýı Sın bolsa, Rıo Olımpıadasynyń komandalyq saıysynyń jeńimpazy, álem chempıonatynda toǵyz ret top jaryp, úsh ret júldegerler qataryna qosyldy. Álem kýbogynda jeti márte teńdessiz dep tanylyp, Azııa oıyndarynda bas júldeniń ekeýin óz qanjyǵasyna baılady.
Úshinshi orynǵa taban tiregen germanııalyq Tımo Bollda óte myqty oıynshy retinde ózin áldeqashan moıyndatqan. 37 jastaǵy ardager tennısshi sońǵy úsh Olımpııa oıyndarynyń komandalyq saıysynda júlde aldy. Sońǵy 16 jylda uıymdastyrylǵan álem chempıonattaryna úzdiksiz qatysyp júrgen ol aıtýly jarysty alty kúmis jáne eki qolamen qorytyndylady. Álem kýbogynda eki ret altyn tuǵyrǵa kóterilip, Eýropa birinshiliginde 17 márte dara shyqty.
Sonymen qatar úzdik on oıynshynyń sanatyna qytaılyq Lın Gaoıýan, germanııalyq Dmıtrıı Ovcharov, japonııalyq Tomakadzý Harımoto, qytaılyq Ma Lýn, koreıalyq Lı San Sý, brazılııalyq Hıýgo Kalderano jáne gonkongtyq Von Chýn Tın syndy sańlaqtar enip otyr. Esimderi atalǵan osy jigitterdiń barlyǵy da asa iri halyqaralyq dodalarda júlde alyp júrgen saqa sportshylar.
Jalpy, erler arasyndaǵy eń ozyq 50 tennısshi qatarynda Japonııanyń – 9, Germanııanyń – 7, Qytaıdyń – 6, Ońtústik Koreıanyń – 5, Taıpeıdiń – 4, Fransııa, Portýgalııa, Shvesııa, Úndistannyń – 2, Gonkong, Nıgerııa, Danııa, Egıpet, Ýkraına, Qazaqstan, Horvatııa, Ispanııa, Anglııa, Brazılııa jáne Aýstrııanyń 1 ókili bar.
Ǵalym SÚLEIMEN,
«Egemen Qazaqstan»