О́tken aptada Ortalyq kommýnıkasııalar qyzmetinde «Junior Eurovision» respýblıkalyq balalar baıqaýynyń fınalısterin habarlaýǵa arnalǵan baspasóz máslıhaty ótti. Sharaǵa «Habar» agenttigi» AQ tóraǵasy Alan Ájibaev, tóraǵa orynbasary Rınat Kertaev, Qazaqstannyń halyq ártisi Roza Rymbaeva qatysyp, júzden júırik, shyqqan qatysýshylardyń esimderin atady.
Olardyń ishinde Zere Ámirbekova, Dınar Nádirbekova, Súıkim Qabylbek, Danelııa Tóleshova, Erjan Maksım, Marııa Zatvarnıskaıa, Meıirjan Jıdebaı, Janelıa Qaldybek, Sanat Asýat, Bınýra Saýdabaı bar.
Irikteýden irkilmeı ótip, aqtyq synǵa joldama alǵan ónerpazdar Almaty qalasynda ótetin gala-konsertke daıyndyqty bastaıdy, atalǵan shara qala kúnine oraı 22 qyrkúıekte shahar ákimdiginiń qoldaýymen júzege asady.
«Negizgi maqsat balalardyń ishindegi eń talantty, eń daryndy ánshimizdi halyqaralyq jarysqa attandyrý. Halyqaralyq jarys Belarýs elinde ótetin bolǵandyqtan, konkýrstyń formaty erekshe bolatyny belgili. Oryndalatyn shyǵarmalardyń deńgeıin bilý kerek. Jáne bizdiń oryndaýshymyz óziniń obrazy, sahnadaǵy qozǵalysy, minez-qulqy, obrazǵa kirip oryndaýshylyǵy, sonymen qatar balalyq, sábılik náziktigin de saqtap, erekshe symbatty kórinse, ol bala júldesiz oralmaıdy», dedi Roza Rymbaeva.
Almaty qalasynda ótetin gala-konsertti «Habar» telearnasy tikeleı efırde kórsetedi. Al kórermender ózderine unaǵan qatysýshyǵa sms-habarlama joldap jáne telefon arqyly habarlasyp daýys bere alady. Sondaı-aq daýys berýge qazylar alqasy da qatysady. Jeńimpaz halyq daýysy jáne qazylardyń ortaq sheshimimen anyqtalady. Sonymen qatar sharada otandyq mýzyka salasynyń ártisteri de óner kórsetedi dep josparlanýda.
Konsert aıaqtalǵan soń jeńimpaz 25 qarasha kúni Mınsk qalasynda ótetin fınalǵa daıyndalady.
Aıta ketetin taǵy bir jaıt, respýblıkalyq irikteýge ótinimder 1-31 tamyz aralyǵynda khabar.kz saıty arqyly qabyldanǵan bolatyn. Jalpy sany 134 úmitker ótinish bildirgen. Qyrkúıek aıynyń basynda 11 adamnan quralǵan qazylar alqasy ulttyq irikteýdiń fınalısterin anyqtady. Olardyń quramynda Roza Rymbaeva, Meırambek Bespaev, Tamara Asar, Baǵym Muhıtdenova, Erke Esmahan, Qaırat Nurtas, Renat Gaısın, Láılá Sultanqyzy, Mádına Sadýaqasova, Dımash Qudaıbergen jáne Alan Ájibaev bar.
Raýan QAIDAR,
«Egemen Qazaqstan»