Áke – jaýapty laýazym

Qostanaıda sońǵy jyldary pedagogıka ǵylymdarynyń kandıdaty, A.Baı­tur­synov atyndaǵy memlekettik ýnıver­sı­tettiń professory Lılııa Sarkısıan jetekshilik etetin «Múgedek stýdentterge arnalǵan qoljetimdi bilim» qoǵamdyq uıy­my otbasynyń beriktigi, otbasyndaǵy jáne bala tárbıesindegi ákeniń róli jóninde kóptegen sharalar júrgizip keledi. Ústimizdegi jyly osy úkimettik emes uıymnyń uıytqy bolýymen «Meniń ákem óte jaqsy» jáne «Áke – jaýapty laýa­zym» jobalary qolǵa alynǵan bolatyn. Alǵashqy joba boıynsha Qostanaı qa­la­syndaǵy mektepterdegi 7 jáne 17 jas ara­ly­ǵyndaǵy balalar arasynda bes ata­lym boıynsha baıqaý uıymdas­tyryldy. Balalar ádebı jáne mýzykalyq shyǵar­ma­larda, sal­ǵan sýretterinde, fotosýretterde áke tý­ra­ly óz oılaryn jetkizdi. Mun­daı baıqaý «Men – ákemin» degen taqy­ryp­pen ákelerdiń arasynda da ótti. So­ny­men qatar, otba­syn­daǵy ákeniń róli jáne shańyraqtyń bıik, bosaǵanyń beriktigin saqtaýdyń ózektiligi jónindegi buqaralyq aqparat quraldarynda jarııalanǵan, kór­se­tilgen materıaldary úshin jýrnalıster de baıqaýdan tys qalmady. Baıqaýlarǵa barlyǵy 279 jumys tústi. Jeńimpazdar anyqtaldy. – Osy joba sheńberindegi baıqaýǵa qa­tys­qan bala da, áke de jeńiske jetti dep oı­laı­myn. Olar qoǵamdaǵy ózekti bolyp otyr­ǵan má­selege óz kózqarastaryn bildirip ǵana qoı­ǵan joq, sonymen qatar árkim onyń sheshimin tabar jol izdedi, – deıdi Lılııa Vaganovna. Al «Áke – jaýapty laýazym» jobasy sheń­berinde ótken sharalarǵa oblystaǵy ǵa­lymdar, kópke tanymal shyǵarmashylyq adam­dary, mektepterdegi áleýmettik pedagogtar, psıhologtar, úkimettik emes uıym­dar, din ókilderi tartyldy. Konferen­sııa­nyń «Áke – jaýapty laýazym» degen sek­sııalyq májilisteri Qostanaı qala­syn­daǵy joǵary oqý oryndary men mektepterde, kitaphanalarda ótti. Mysaly, Qos­tanaı pedagogıka kolledjinde pedagogıka ǵylymdary­nyń kandıdaty I.Parhomenko júrgizgen «Otba­syndaǵy adamgershilik qa­rym-qaty­nas­tyń damýyndaǵy ákeniń róli» degen su­raq-jaýap formasyndaǵy leksııaǵa 96 stýdent qatys­qan bolsa, onyń 70-i uldar, ıaǵnı bolashaq ákeler. Mektepterde ótken osy tektes ta­qy­ryptaǵy áńgimelerge oqýshylar qatys­ty­ryldy. Al L.Tolstoı atyndaǵy ortalyq kitaphanada otyzdan asa jas sha­ńy­raq ıeleri – ákeler bas qosyp, áleýmettik mańyzy tereń áńgime qozǵady. Elbasy Nursultan Nazarbaev otbasy ınstıtýtyn damytýdy memlekettik saıasat deńgeıine kóterdi, elimizde 2015 jylǵa ar­nalǵan genderlik tepe-teńdik Stra­tegııasy jasaldy. Ulttyq dástúrdiń, halyqtyq peda­gogıkanyń, tilimiz ben dilimizdiń tuma bastaýy – otbasynyń, bala baqytynyń tú­gel bolýy úshin de ákeniń orny ortaı­maýy tıis. Sondyqtan «Múgedek stýdentterge arnalǵan qoljetimdi bilim» qoǵam­dyq uıymy kótergen másele Qostanaı jurtshylyǵynyń nazaryn aýdaryp otyr. Názıra Járimbetova, Qostanaı.