Almatynyń týǵan kúni – qala turǵyndarynyń asyǵa kútetin aıtýly merekesi. Qala kúnin atap ótýdiń alǵashqy sharalaryn shahar halqy qýanyshpen qabyldaýdy bastady. 12-13 qyrkúıek kúnderi shahar ómirindegi shýaqty sharalardyń biri – ashyq aspan astynda jyl saıyn uıymdastyrylatyn IH Orkestrler festıvali bolyp ótti. Qazaq óneri men mádenıetine qyzmet etip kele jatqan mańyzdy shyǵarmashylyq ujymdardyń, sondaı-aq mýzyka aspaptarynda oınaıtyn jeke oryndaýshylar men vokal sheberleriniń qatysýymen eki kún boıyna orkestrlik áýen áýede qalyqtap turdy.
Sahna tórinde Qurmanǵazy atyndaǵy Qazaq memlekettik akademııalyq ult aspaptary orkestri, N.Tilendıev atyndaǵy «Otyrar sazy» akademııalyq folklorlyq-etnografııalyq orkestri, Almaty qalasy ákiminiń estradalyq-sımfonııalyq orkestri jáne Qazaqstan Respýblıkasynyń Memlekettik úrmeli aspaptar orkestriniń bir mezgilde óner kórsetýi kásibılikti ǵana emes, ónerdegi yntymaqty, ujymdaǵy óristeý men damýdy da pash etkendeı boldy. Merekeniń alǵashqy kúni klassıkalyq mýzyka áýesqoılaryna «Kúıden klassıkaǵa deıin» atty tamasha mýzykalyq baǵdarlama usynyldy. Alǵashqyda alystan qalyqtap jetken mýzyka únine eltip jınala bastaǵan shoǵyrdyń qarasy sırek bolǵanymen, keshke qaraı shoqtana túsken júzdegen, myńdaǵan kórermen Abaı eskertkishiniń aınalasyn dúbirletken naǵyz orkestrler sherýin tamashalady.
Ashyq aspan astyndaǵy konsertte qazaqtyń aspaptyq jáne vokaldyq klassıkasynyń jaýharlary, halyq ánderi, orys jáne eýropalyq avtorlardyń klassıkalyq áýenderi, zamanaýı sazgerlerdiń shyǵarmalary, kınofılmderdiń saýndtrekteri birinen soń biri oryndalyp jatty. Orkestrlerdiń súıemeldeýimen Zarına Altynbaeva, Jámılá Serkebaeva, Ultý Qabaeva, Baqyt Turmanova, Farhat Kýbıev, Danııar Baıjumanov, Nursultan Shatyrhanuly sııaqty opera, sımfonııalyq saz sheberleri, estrada oryndaýshylary óner kórsetse, «Satzhan project», «Ifly» toptarynyń ónerpazdary da juldyzdy keshti jarqyrata tústi.
Aıgúl AHANBAIQYZY,
«Egemen Qazaqstan»
ALMATY