Atyraý oblysynyń 2 myń turǵynyna arzan baǵamen úı satyp alýǵa múmkindik bar. Oblys basshysy Nurlan Noǵaev, «Turǵyn úı qurylys jınaq banki» AQ basqarma tóraıymy Lázzat Ibragımova jáne «Atyraý» ÁKK basshysy Marat Túsipqalıev yntymaqtastyq týraly memorandýmǵa qol qoıdy.
Kelisimshartqa sáıkes 297 páterge arnalǵan 4 nysannyń qurylysy júredi, al turǵyn úıler keler jyly paıdalanýǵa berilmek. О́ńir turǵyndaryn baspanamen qamtý úshin budan basqa da birqatar memorandýmdarǵa qol qoıyldy.
Oblys ákimi Nurlan Noǵaevtyń aıtýynsha, qazir aımaqta 3 myń páterli 44 kópqabatty úı salynyp jatyr. Jyl sońyna deıin 2 myń páterge arnalǵan 34 kópqabatty úı paıdalanýǵa beriledi. «7 – 20 – 25» memlekettik baǵdarlamasy bastalǵaly beri 59 ótinim qabyldanyp, 34-i bekitilgen. «Nursaıa» yqsham aýdanynda «Jas Otaý» turǵyn úı baǵdarlamasyna sáıkes 100 páterlik turǵyn úı qurylysy bastalady. Oǵan 29 jastan aspaǵan jas otbasylar qatysa alady. Páterdiń bir sharshy metriniń quny 179 myń teńgeden esepteledi. «Nurly jer» baǵdarlamasy boıynsha «Nursaıa», «Bereke» yqsham aýdandarynda 21 turǵyn úı salý josparlanyp otyr.
Qurylysqa qatysty taǵy bir jańalyq – oblys ortalyǵy mańynda ornalasqan Talǵaırań aýylynda 80 jekemenshik úı turǵyzylady. Aýdany 64-191 sharshy metr bolatyn úıdiń bir sharshy metriniń quny 120 myń teńgege baǵalanǵan. Talǵaırańda turǵysy keletinder jer ýchaskesin alý úshin jergilikti ákimdikte kezekte bolýlary kerek degen shart bar.
Jańadan jasalǵan memorandýmdardyń qaı-qaısysy da baspanaly bolýǵa nıettiler úshin qolaıly.
Baqytgúl BABASh,
«Egemen Qazaqstan»
ATYRAÝ