Elimizde «Soltústik-Ońtústik» turaqty elektr jelisi salynbaq. Jańa tehnologııalyq jeliniń qýaty dástúrli jelige qaraǵanda 4-5 esege artyq bolady. Bul týraly ortalyq kommýnıkasııalar qyzmetinde ótken jıynda «KEGOG» AQ-tyń Basqarma tóraǵasy Baqytjan Qajıev málimdedi.
− Qazirgi tańda «Soltústik-Ońtústik» turaqty tok jelisin salý múmkindigin qarastyrýdamyz. Bul Qazaqstanda ǵana emes, sonymen birge TMD elderi keńistigi boıynsha alǵash qolǵa alynyp otyrǵan joba. Jańa elektr energııasyn óndirý jelisi óz kezeginde dástúrli jelilermen salystyrǵanda qýatty 4-5 esege artyq jetkizýge múmkindik beredi. Sonymen qatar ıntellektýaldy tehnologııa arqyly uzaq qashyqtyqtan elektr energııasynyń jetkizilýin basqarýdy qamtamasyz etedi, – dedi «KEGOG» AQ-tyń basqarma tóraǵasy.
«KEGOG» kompanııasynyń basshysy keltirgen aqparat boıynsha, búginde respýblıkadaǵy elektr stansalarynyń belgilengen qýatynyń jıyntyq kólemi 428 MVt-ty quraıdy, onyń arasynda «Býrnye Solıar 1,2» JShS (Jambyl oblysy, jıyntyq qýaty – 100 MVt), «Tuńǵysh jel elektr stansasy» JShS (Aqmola oblysy, qýaty – 45 MVt) sııaqty iri nysandar bar.
− Búgingi tańda kompanııa aldyndaǵy taǵy bir mańyzdy sharýalardyń biri – energııa taratýshy kompanııalardan básekege qabilettilikti talap etý. Osy oraıda, aǵymdaǵy jyldyń mamyr jáne maýsym aılarynda alǵashqy aýksıon ótkizildi. Onyń qorytyndysy boıynsha jalpy qýaty shamamen 200 MVt-ty quraıtyn kún, jel, bıogaz jáne gıdroelektr stansalaryn salý boıynsha 19 jańa joba iriktelip alyndy. Ústimizdegi jyldyń qazan aıynda aýksıonnyń ekinshi kezeńin ótkizý josparlanyp otyr, – dedi B.Qajıev.
Sonymen qatar «Sıfrly Qazaqstan» memlekettik baǵdarlamasy aıasynda «KEGOC» AQ «Qazaqstannyń Birtutas elektr energetıkalyq júıesi rejimderin basqarýdy avtomattandyrý» jobasyn iske asyryp jatqanyn aıta keteıik.
Erkejan AITQAZY,
«Egemen Qazaqstan»