Jurtshylyqtyń talap-tilegin jeke kásipker jete eskerip otyr

 «Jol muraty – jetý» ekenin kez kelgen jolaýshy jaqsy túsinedi. Saparǵa shyqqanda dittegen mejege jetip aıaq shaldyrǵansha taǵat tappaıtyny sondyqtan. Ara­qa­shyqtyq jaqyn bolsa, bir sári. Al «jol azabyn júrgen bile­di» demekshi, ushqan qustyń qana­ty, júgirgen ańnyń tuıaǵy talatyn qazaqtyń saıyn dalasynyń bir shetinen ekinshi shetine ba­rý úshin talaı qyrdy artqa tas­tap, nebir qıyndyqtar men aýyrt­palyqtardy eńserýge týra keledi. Onyń ústine ultymyzdyń úıden qyryq qadam uzap shyqqan jolaý­shyny músápirge teńeıtini bar. Osyndaıda jol boıyndaǵy ser­vıstik nysandar uzaq joldan sharshap, qajyp kele jatqan jandy otbasyna oralǵandaı qushaq jaıa qarsy alyp, dámdi as-sýyn, jaıly jatyn ornyn usynyp, minsiz qyzmet kórsetip jatsa, kánekı! Demniń arasynda qyrysqan qabaq jazylyp, boı da, oı da sergip, eńseni ezgen, júıkeni juqartqan jaısyzdyq áp-sátte umytylar edi. Jáne de Qazaqstan Eýrazııalyq eko­no­mıkalyq odaqqa, biryńǵaı keden keńistigine qosylǵaly alys, ja­qyn eldermen saýda-sattyq, basqa­daı da baılanystar artyp, búgin­de árli-berli tynymsyz aǵyl­ǵan, jeldeı júıtkigen júk kólik­terinen kóz súrinedi. Demek, alys shaqyrymdardy betke alyp, artqa tastaıtyn júrgizýshiler de bir mezet kóz shyrymyn alyp, jaqsylap tynyǵyp alýǵa beıil degen sóz.

 Jasyratyny joq, oblystyń jol boıynda ornalasqan servıs qyz­metine, ásirese dámhanalarda daıyn­dalatyn tamaqtyń sapasyz­dyǵyna, gıgıenalyq-tazalyqtyń tómendigine renish kóp aıtylatyn. Arnaıy komıssııa birneshe márte tekserý reıdterin júrgizip, kemshilikterdi anyqtaǵanmen ýaqyt óte burynǵy «taz qalpyna» qaıta túsetin. Sońǵy kezderi bul baǵytta tártip kúsheıtilip, naqty sharalardyń júzege asyrylýy arqasynda jolaýshylarǵa sapaly servıstik qyzmet kórsetý jolǵa qoıyla bastady. Respýblıkalyq mańyzǵa ıe Astana-Petropavl baǵytyndaǵy kúre jol kúrdeli jóndeýden ótip, qalpyna kelti­ril­geli jaýynnan keıin sańyraý­qu­laqtaı paıda bolǵan qyzmet kór­setý oryndary arasynda óza­ra básekelestiktiń serpin alǵa­ny seziledi. Basty tasjoldyń jú­z­degen shaqyrymdary Taıynsha aýdanyn kókteı ótetindikten bızneske qolaıly aýmaq ekenin birden ańǵarǵan Myrzahan Qamalov jol boıyndaǵy servıstik qyzmetti da­my­týdy alǵashqylardyń qa­tar­yn­da qolǵa alǵan edi. Ká­sip­kerlik qadamyn osydan 22 jyl buryn Dra­gomırov eldi mekenine taqaý 100 oryndy dámhanany óz qara­jatyna salýdan bastaǵan. Kásibin turaqty násipke aınaldyrýdy maqsat etken ol keıin jeńildikti baǵ­darlamalarǵa qatysyp, qyz­met aıasyn keńeıtti. «Bastau Bıznes» jobasy aıasynda bilimin jetildirip, «Agrokredıt» korpora­sııasy arqyly 18 mıllıon teń­ge demeýqarjy aldy. Bul qa­ra­jatqa kólik jýý nysanyn is­ke qosyp, ekiqabatty qonaq úıi men tehnıkalyq qyzmet kórsetý stan­­sa­syn turǵyzýǵa kirisip ketti. Qu­ral-jabdyqtarǵa tapsyrys be­ri­lipti. Ondaǵan aýyldastaryn tu­raq­­ty jumyspen qamtamasyz etken.

Kúre joldyń boıynda «Man­sur» shaǵyn bıznes kesheniniń boı kótergenine halyqaralyq reıs­terge qatynaıtyn júrgizýshiler de, qoǵamdyq kólik júrginshileri de, jergilikti turǵyndar da dán rıza. Solardyń biri astanalyq Sy­rym Imanbaevtyń aıtýyn­sha, buryndary tústenetin, tamaq­tanatyn oryndar tazdyń sırep qalǵan shashyndaı ár-ár jerde ǵana kezdesip, amalsyzdan at basyn buratyn. Tipti kesheden qalǵan sýyq taǵamdy talǵajaý etip, barǵa qanaǵat etetin. Endi shekesinen shertip júrip tańdaıtyn, tal­ǵaı­tyn bolypty. Jolaýshylar ara­synda qazir «Mansur» kesheni tanymaldylyqqa ıe. Onyń atyn atasa bas barmaǵyn kórsetip, jetkenshe asyq. Munda tamaqtyń neshe túri qolma-qol ázirlenip, býy burqyraǵan kúıi dastarqanǵa qoıy­lady. «Taǵam shyny áınektiń arǵy jaǵynda kóz aldymyzda ázir­lenetindikten sapasy kúmán týdyr­maıdy. Dámdiligi til úıiretin samsa-kúlshelerdi, ıilip qyzmet kórsetetin aspazdardyń kishi­peıil­digin aıtsańshy. Qa­lyp­ty demalýǵa barlyq jaǵdaı ja­salǵandyqtan, tań­daýymyz osy­ǵan túsedi, deıdi elordalyq meıman.

Myrzajan Qamalov jeke sha­rýa­syn urshyqsha úıirýmen qatar qa­ıyrymdylyq sharalarǵa da bel­sene qatysyp turady. Drago­mırov mektep úıin jóndeýge járdem­desip, qarttarǵa, kóp balaly ot­ba­sylarǵa materıaldyq qoldaý kórsetipti. Byltyr EKSPO-2017 halyqaralyq maman­dan­dyrylǵan kórmesine jerlesteri­niń saıahattap baryp-qaıtýyna qa­rjylyq demeý jasapty.

Kásipkerlik qadamyn káýap satýdan bastaǵan ol qazir jol boıyndaǵy servıstik qyzmettiń aıasyn keńeıtýmen qatar sapasyna da erekshe mán beredi.

О́mir ESQALI,

«Egemen Qazaqstan»

Soltústik Qazaqstan oblysy