Ádebı keshke aqyn Ońaıgúl Turjan, kınotanýshy, ónertaný kandıdaty Názıra Rahmanqyzy, Qazaqstannyń eńbek sińirgen qaıratkeri Roza Muqanova jáne «Egemen Qazaqstan» gazetiniń jýrnalısteri men ádebıet áleminde júrgen shyǵarmashyl jastar qatysty. Aıtýly kezdesýdi «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli Aqparat jáne kommýnıkasııalar mınıstri Dáýren Abaevtyń quttyqtaý sózimen ashyp berdi.
Kezdesý barysynda qadirli qonaqtar sóz alyp, mereıtoı ıesiniń shyǵarmashylyq áleminen jan-jaqty syr qozǵasa, jastar jaǵy osy sátti paıdalanyp súıikti qalamgerine kókeıinde júrgen qyzyqty saýaldaryn qoıyp, tushymdy jaýap aldy. Syrlasý stılinde ótken júzdesýdiń ereksheligi de sol – munda jazýshy buǵan deıin eshbir jerde aıtylmaǵan tyń derek, qyzyqty sátterimen búkpesiz bólisti. Oqyrmandaryna jan syryn aqtardy.
«Kúldirý úshin aıtaıyn: men kitapty shalqamnan jatyp oqımyn. Sosyn asyqpaımyn. Eki-úsh betten keıin jaýyp qoıamyn. Sodan araǵa birshama ýaqyt salyp ári qaraı jalǵastyryp oqımyn. Bir oqyǵanymdy keıin qaıtadan qaıtalap oqý – jas kúnimnen kele jatqan jaqsy ádetterimniń biri dep sanaımyn. Sebebi syryldatyp oqyp, sıýjetti ǵana qýyp ketseń, ol oqý emes. Men kitaptyń, ondaǵy oqıǵanyń ishinen ózime ustaz adamnyń minezin izdeımin. Kitap – ustaz.
Sheberlik degenniń ózi bilimge baılanysty. Kóp oqý arqyly óz stılińdi qalyptastyrasyń. О́mirdi kósheden ǵana bilip qalmańdar, ómirdi ádebıetten qabyldaý, sodan úırený kerek. Odan keıin taǵy bir aıtarym – jazýshyǵa ómirbaıan qajet. Eger bolmasa, qoldan jasaý kerek. Qıyndyqtan, ózgerýden qoryqpaǵan, aǵysqa qarsy júzýden júreksinbeıtin adamnan jaqsy jazýshy shyǵady» degen qalamger kezdesýge jınalǵan jastarǵa aqylyn aıtyp, shyǵarmashylyq tájirıbesimen bólisti.
Ákim Tarazı – ádebıet áleminiń ǵana alyby emes, kıno men teatr dramatýrgııasynda da sýretker salǵan sara jol saırap jatyr. Qalamger ssenarııi boıynsha kórermenge jol tartqan «Tulpardyń izi», «Qarash-qarash oqıǵasy», «Mustafa Shoqaı» fılmderiniń qaı-qaısysy da mazmun tereńdigi, tarıhı derekterdi kórkemdik turǵydan sheber sóıletýimen jáne de bir-birine uqsamaıtyn tyń da kúrdeli beınelerdi shynaıy jetkizýimen qundy. Ákim Tarazı boıyndaǵy shyǵarmashylyq tyń qýat pen shynaıy sheberlikten bólek, jazýshynyń azamattyq bolmysyndaǵy batyldyq pen birbetkeılik, ójettik te árbir týyndysynyń tabıǵatyna berik ornyǵyp, sonysymen de qalamgerdiń ózine ǵana tán daralyq túzgen. Sol minezimen, óz kózqarasynan aınymas adaldyǵymen kezindegi qylyshynan qan tamǵan qıyn kezeńderdiń ózinde tas jarǵan Tarazı talanty, Tarazı sheberligi oqyrmanyna sonysymen ystyq, sonysymen aıaýly.
«Bul kisi – ádebıet áleminiń Ákimi! Ákim aǵamyz Áýlıeata áli «Djambýl» atalyp júrgende Taraz ataýyn tiriltken tulǵa! Damolla Áshimniń úmitin arqalaǵan ol kisiniń azan shaqyryp qoıǵan aty – Hakım. Dálirek aıtqanda, Hakim! Hakim – dúnıeniń túpki mánin tereń uqqan ǵulama, xıkmet-syrdyń ıesi degen maǵyna beredi. Abaıdy xakim deıtinimiz sondyqtan. Ákim aǵamyz – rasynda, Abaısha aıtqanda, «aqyryn júrip, anyq basatyn, qalyby ózgermeıtin, minezi minsiz, aınymaıtyn asyl adam» dep quttyqtaý lebizin jetkizgen basylym basshysy Darhan Qýandyquly taǵylymdy kesh sońynda mereıtoı ıesine barsha ujym atynan shapan jaýyp, qurmet kórsetti. Shynaıy órbigen ádebı áńgimeden rýhanı lázzat alǵan oqyrman qaýym da kezdesýden marqaıyp tarqasty.
Nazerke JUMABAI,
«Egemen Qazaqstan»