Áýlıeata óńirinde dúnıege kelgenimen, búkil qazaqtyń qaısar ulyna aınalǵan Baýyrjan Momyshuly esimi el úshin qasterli. Kózi tirisinde aty ańyzǵa aınalǵan alyp tulǵa qazaq halqy úshin batyrlyq pen erliktiń naǵyz úlgisi retinde tarıhta qaldy. Sondyqtan da el arasynda dańqty batyrǵa degen qurmet pen taǵzym eshqashan tolastamaq emes.
Taraz qalasyndaǵy «Jeńis» saıabaǵy jýyrda qaıtadan kúrdeli jóndeýden ótip, kópshiliktiń kóz toqtatyp qaraıtyn ornyna aınalǵany belgili. Saıabaq ortasynan Baýyrjan Momyshulynyń eńseli eskertkishi boı kóterip, sonymen qatar Jambyl jerinen maıdanǵa attanǵan myńdaǵan jaýyngerdiń esimi jazylǵan taqtalar ornatylǵan bolatyn. Jýyrda Áýlıeata óńirine batyrdyń kelini, jazýshy Zeınep Ahmetova kelip, jambyldyq jurtshylyqpen júzdesti. Áýeli batyrdyń eńseli eskertkishine gúl shoqtaryn qoıyp, rýhyna taǵzym etti. Sonymen qatar «Jeńis» saıabaǵyn aralap kórip, óziniń rızashylyǵyn bildirdi.
Budan keıin Zeınep Ahmetovanyń qatysýymen «Balasaǵun» ortalyq konsert zalynda kópshilikpen kezdesý ótti. Dańqty batyr týraly taǵylymdy áńgimeni tyńdaýǵa jurtshylyq kóptep jınaldy. Atalǵan sharany Jambyl oblystyq ishki saıasat basqarmasy uıymdastyrǵan bolatyn. Kezdesýdi basqarma basshysy Berik Qurmanǵalı ashyp, erkin formatta júrgizip otyrdy. «Zeınepti halyq tárbıeledi. Men myna sanaly ǵumyrymda ata bedeline tıtteı daq túsirip, nuqsan keltirmeýge tyrysyp kelemin. «Bireýdi maqtasań da, jaǵympazdanba. Bireýdiń kemshiligin aıtsań, kózine tike qarap aıtatyn bol» deıtin ata. Ol kisiniń ósıeti bizge mura. «Basynda bulaǵy bar ózen uzaq aǵady» demekshi, bizdiń bastaý-bulaǵymyz – ata. Nemere-shóberelerine atanyń áńgimelerin, ósıetin aıtyp, qulaqtaryna quıyp otyramyn», dedi Zeınep Ahmetova óz sózinde.
Kezdesý barysynda Zeınep Ahmetova batyr týraly tolǵanystaryn aıta kelip, ulttyq qundylyqtar, salt pen sana, búgingi qazaq kelinderi týraly da óz oıymen bólisti. Osy oraıda jurtshylyq batyrdyń kelinine saýaldaryn aýyzsha jáne jazbasha túrde joldap, tıisti jaýap aldy. Sonymen qatar Jambyl óńirine kelip-ketip júrgenimen, tulǵa retinde tuńǵysh ret shaqyrtý túskenin de aıtyp ótti. «Bul meniń jolym emes, Baqytjannyń joly edi. Amal neshik, taǵdyrdyń jazýyna kim qarsy tura alǵan? Baqytjannyń ornyna ózim kelip otyrmyn. Osynaý qurmet meniń myqtylyǵym demeımin, atanyń arqasy», dep kisilik jóninen áńgime órbitti. О́z sózinde jazýshy ana tárbıesi úlken sabaq ekenin, sondyqtan da qazaq qyzdarynyń ınabatty, tárbıeli bolý kerektigin jetkizdi.
Kelesi kúni Zeınep Ahmetova Taraz memlekettik pedagogıkalyq ýnıversıtetinde jáne Taraz ınnovasııalyq-gýmanıtarlyq ýnıversıtetinde ótken kezdesýlerge qatysty. Mundaǵy kezdesý barysynda da taǵylymdy ári tárbıeli áńgimeler aıtyldy. Sonymen qatar, Jambyl atyndaǵy «Rýhanııat» ortalyǵyna da kelip, kópshilikpen júzdesti. Kezdesýdi Jambyl oblystyq mádenıet, arhıvter jáne qujattama basqarmasynyń basshysy Dúısenáli Byqybaev júrgizip otyrdy.
Zeınep Ahmetovanyń úsh kúnge sozylǵan Jambyl jurtshylyǵymen júzdesýi batyrdyń týǵan jeri Jýaly aýdanynda jalǵasyn tapty. Munda batyrdyń kelini Baýyrjan Momyshulynyń eskertkishine gúl shoqtaryn qoıý rásimine qatysyp, batyr atyndaǵy mýzeıdi aralap kórdi. Sonymen qatar aýdan ortalyǵy Baýyrjan Momyshuly aýylyndaǵy aýdandyq Mádenıet úıinde jurtshylyqpen júzdesti.
Hamıt ESAMAN,
«Egemen Qazaqstan»
Jambyl oblysy