Almatyda el jastaryn qanattandyrýǵa baǵyttalǵan halyqaralyq jastar forýmy ótti. Atalǵan forýmdy utymdy ıdeıasymen kózge túskender úshin óz armandaryn iske asyrýdyń taptyrmas múmkindigi dep ataýǵa bolady.
Qaı eldiń de jarqyn bolashaǵy jan-jaqty bilimdi, ushqyr oıly talantty jastar. Atalǵan jobanyń basty maqsaty ár saladaǵy daryndy jastardyń basyn qosyp, olardyń arman-maqsattaryna jol ashý deıdi uıymdastyrýshylar. Forým jumysyna Ázerbaıjan, Reseı, Belarýs, Qyrǵyzstan, О́zbekstan jáne Qazaqstan jastar uıymdarynyń músheleri, memlekettik organdardyń ókilderi, jas kásipkerler men eriktiler qatysty.
Sharanyń resmı ashylý saltanatynda TMD elderinen kelgen delegasııa jetekshileri sóz sóılep, elimizdiń qonaqjaılylyǵyna alǵystaryn bildirdi. О́zara tájirıbe almasyp, tyń ıdeıalarymen bólisken jetekshi jastar ekonomıka, áleýmet, bilim, mádenıet, sport salalaryndaǵy jetistikterdi saralap, osy baǵyttar boıynsha áli de sheshimin taba almaı kele jatqan ortaq problemalarmen kúresýdiń ońtaıly jolyn qalyptastyrý máselesine toqtaldy. Ǵalamǵa ortaq máselelerdiń túıtkildi tustaryn saraptap, bilim men bilik, eńbek pen tabys qupııalary tóńireginde oı bólisti. Basqosý aıasynda «Zamanaýı týrızmniń trendteri», «Volonterlik ómir salty beınesi», «Jastar jáne bıznes», «Aqparat aǵymyndaǵy jastar» taqyryptarynda suhbat alańdary ótti. Bilikti jastar óz tájirıbe joly men jetistikteriniń qupııalaryn ortaǵa saldy.
Jastar isi jónindegi federaldyq agenttiktiń halyqaralyq qyzmet bóliminiń basshysy Dmıtrıı Ivanov óz sózinde Reseı Federasııasy úshin TMD keńistigindegi ózara yqpaldastyqta jastar arasyndaǵy ózara is-qımyldy damytý basym baǵyt bolyp tabylatynyn atap ótti.
«Biz óz tarapymyzdan ár túrli bastamalardy konstrýktıvti túrde qoldaýǵa daıynbyz. Bizde granttyq qoldaýdy júzege asyratyn múmkindikter bar. Forýmǵa qatysýshylardyń alǵan tájirıbeleri bolashaqta óz jemisin beredi dep úmittenemiz», – deıdi ol. Reseı delegasııasynyń basshysy usynylǵan jobalardy júzege asyrý úshin Jol kartasyn ázirleýdi usyndy. Al Ázerbaıjan jastar uıymdarynyń Ulttyq keńesiniń tóraıymy M.Medjıdova jastar kásipkerligi men eriktilik qyzmetti damytýdyń tyń tetikteri, jastar uıymdary men jobalarynyń ózektiligi jaıly oı órbitti. Onyń sózinshe, sońǵy jyldary álem jastarynyń bızneske degen qulshynysy artqan. Sondyqtan ár memleket jastar usynǵan utymdy jobalarǵa demeý kórsetý qajet.
Odan bólek Qyrǵyz Respýblıkasy úkimeti janyndaǵy Jastar isi, dene shynyqtyrý jáne sport jónindegi memlekettik agenttiginiń jastar saıasaty bóliminiń bas mamany A.Adamalıev, Belarýs Respýblıkasy Bilim mınıstrliginiń «Balalar men jastardyń kórkem shyǵarmashylyǵy ulttyq ortalyǵy» respýblıkalyq jastar bilim berý ortalyǵy mekemesiniń meńgerýshisi D.Týronok, О́zbekstannyń búkilálemdik jastar qaýymdastyǵynyń tóraǵasy M.Álimbaev, «Masıs» «Qazaqstandyq armıan qoǵamy» respýblıkalyq qoǵamdyq birlestigi tóraǵasynyń orynbasary A.Navasardıan forýmda qamtylǵan taqyryptar tóńireginde óz usynystaryn ortaǵa saldy.
Forým qorytyndysy boıynsha qatysýshylardyń usynystary negizinde tıisti usynymdar qabyldanatyn bolady.
Arman OKTIаBR,
«Egemen Qazaqstan»
ALMATY