Qazaqstan Prezıdenti Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnovany qabyldady, dep habarlaıdy Aqordanyń baspasóz qyzmeti.
Búgingi kezdesý barysynda Memleket basshysyna Respýblıkalyq bıýdjettiń atqarylýyn baqylaý jónindegi esep komıtetiniń qazirgi qyzmeti jáne memlekettik baǵdarlamalardyń aýdıti, sondaı-aq óńirlerdegi tekserý komıssııalaryna kórsetilip jatqan ádistemelik qoldaý jumystary týraly málimet berildi.
Nursultan Nazarbaev bıýdjet qarjysyn tıimdi ıgerýdi jáne onyń qoldy bolýyna jol bermeýdi qamtamasyz etý isindegi Esep komıtetiniń mańyzdy rólin atap ótti.
– Esep komıteti – memleket qarjysynyń oryndy ıgerilýin jáne bıýdjettiń atqarylýyn táýelsiz baǵalaýdy qamtamasyz etetin mańyzdy organ. Qarajat tek kózdelgen maqsatqa bólinýge tıis, – dedi Qazaqstan Prezıdenti.
N.Godýnova «100 naqty qadam» Ult jospary aıasynda júzege asyrylyp jatqan memlekettik aýdıt júıesin álemdik standarttarǵa saı jańǵyrtýdyń barysy jóninde baıandady.
– Qazirgi ýaqytta Esep komıteti óz jumysynda qarjyǵa qatysty quqyq buzýshylyq faktilerin anyqtaý tájirıbesinen góri tıimdilikti baǵalaýǵa basty mán berip otyr. Biz qarjylyq quqyq buzýshylyqqa negiz bolatyn sebepterdi anyqtaý isinde aýdıt nysandaryna qoldaý kórsetemiz jáne tıisti usynymdar beremiz, – dedi Esep komıtetiniń tóraıymy.
Sonymen qatar, N.Godýnova Qazaqstan Prezıdentine memlekettik baǵdarlamalar men memlekettik organdardyń strategııalyq josparlaryna aýdıt júrgizý jáne respýblıkalyq bıýdjetti josparlaý kezindegi aldyn ala baǵalaý jumystary jóninde baıandady.
Kezdesý sońynda Elbasy Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnovaǵa birqatar naqty tapsyrma berdi.