Sapar barysynda Elbasynyń bes áleýmettik bastamalarynyń júzege asyrylý barysyna basymdyq berildi. Atap aıtqanda, Máýlen Áshimbaev qala ákimi Baýyrjan Baıbekpen jáne Respýblıkalyq qoǵamdyq keńes tóraǵasy, Senat depýtaty Baqytjan Jumaǵulovpen birge jergilikti joǵary oqý oryndarynyń jańadan salynǵan jataqhanalaryna bardy,-«Nur Otan» partııasynyń Baspasóz - qyzmeti.
Sondaı-aq shaǵyn nesıe alyp, kásibin dóńgeletip otyrǵan kásipkerlermen kezdesip, «7-20-25» baǵdarlamasy boıynsha baspanaly bolǵan azamattarǵa páter kiltin tabystaý rásimine qatysty. Odan bólek, Prezıdenttiń bes áleýmettik bastamasynyń júzege asyrylýyn baqylaý jónindegi Respýblıkalyq qoǵamdyq keńestiń otyrysynda partııa tarapynan atqarylǵan jumystarǵa toqtaldy.
Elbasynyń negizgi áleýmettik bastamalarynyń biri joǵary bilim berýdiń qoljetimdiligi men sapasyn arttyrý ekeni belgili. Soǵan oraı Elbasy qosymsha granttar bólýmen qatar, memlekettik-jekemenshik áriptestik aıasynda stýdenttik jataqhanalar salýdy tapsyrdy. Osy rette tek Almatynyń ózinde stýdenttik jataqhanalarǵa degen suranys 22 myń orynnan asyp jyǵylatynyn atap ótken jón. Soǵan baılanysty búginde jergilikti ákimdik 9 joǵary oqý ornyna berý maqsatynda qalalyq qordan qosymsha 11 jer telimin bólip otyr.
Jalpy osy jyldyń sońyna deıin 4 jańadan salynǵan jáne 1650 oryndyq qaıta jańǵyrtylǵan 1 jataqhana paıdalanýǵa berilmek. Odan bólek, 2300 orynǵa arnalǵan 3 jańa jataqhananyń qurylysy bastalady. Kelesi jyly 13 myń orynǵa arnalǵan 26 jataqhana salý josparlanyp otyr. Al 2020 jyly 3 jataqhananyń qurylysy aıaqtalyp, taǵy 3 jataqhana qaıta jańǵyrtylmaq. Sol arqyly jataqhanadaǵy oryn sany 2400-ge kóbeıedi.
Almatyǵa sapary barysynda «Nur Otan» partııasy Tóraǵasynyń Birinshi orynbasary S.Asfendııarov atyndaǵy Qazaq Ulttyq medısınalyq ýnıversıtetiniń jańadan salynǵan jataqhanasyna bardy. Toǵyz qabatty ǵımarattyń jalpy quny – 780 mln. teńge. Munda 167 bólme qarastyrylǵan jáne stýdentterdiń jaıly ómiri úshin barlyq qajetti jaǵdaı jasalǵan.
Sonymen qatar Máýlen Áshimbaev Qazaqstan ınjenerlik-tehnologııalyq ýnıversıtetiniń 400 oryndyq jataqhanasyna bardy. Stýdentter jáne oqytýshylarmen kezdesken ol Elbasynyń jańa áleýmettik bastamalary der kezinde qolǵa alynǵanyn jáne óte ózekti ekenin aıtty.
– Almaty – stýdentter qalasy. Sondyqtan munda elimizdiń ár óńirinen aǵylǵan jastardyń qatary qalyń. Soǵan oraı alyp shaharda jańa stýdenttik jataqhanalar salý jáne olardy qaıta jańǵyrtý máselesi erekshe qoldaý taýyp otyr, – dedi Máýlen Áshimbaev.
Prezıdenttiń taǵy bir mańyzdy áleýmettik bastamasy shaǵyn nesıe berýdi kóbeıtýge baǵyttalǵan. Bul shaǵyn jáne orta bızneske qoldaý kórsetip qana qoımaı, jańa jumys oryndaryn qurýǵa da mol múmkindik beredi. Osy baǵytta «Nur Otan» partııasy Tóraǵasynyń Birinshi orynbasary óz isin damytý maqsatynda memleketten shaǵyn nesıe alǵan kásipkerlermen kezdesti. Máselen, Dınara Qazıeva alǵan qarajatyna óziniń jeke stomatologııasyna jańa jabdyqtar satyp alǵan. Stomatologııaǵa anaıy barǵan partııa Tóraǵasynyń Birinshi orynbasary Elbasynyń bes áleýmettik bastamasy der kezinde qolǵa alynyp, halyqtyń jaǵdaıyn jaqsartýǵa ıgi septigin tıgizip jatqanyn aıtty. Búginde Almaty qalasy boıynsha barlyǵy 80 túrli joba maquldansa, 20-y áli qarastyrylýda.
Máýlen Áshimbaevtyń aıtýynsha, shaǵyn nesıe berýdiń jańa mehanızminiń arqasynda múmkin bolǵan tyń bıznes-bastamalardy iske asyrý Elbasynyń áleýmettik saıasatynyń nátıjesi jáne memleket tarapynan bıznesti qoldaýdyń naqty nátıjesi. Sondaı-aq partııa Tóraǵasynyń Birinshi orynbasary kásipkerlermen kezdesýde kommersııalyq maqsattaǵy bos jer telimderi týraly aqparattardy bir derek kózinen alýǵa múmkindik beretin Biryńǵaı ulttyq geoaqparattyq onlaın qyzmetin qurý partııalyq jobasy týraly aıtyp berdi. Atalǵan geoaqparattyq portal arqyly jer teliminiń maqsaty, ol jerdiń ınfraqurylymy, aýksıon ótetin ýaqyt pen talaptary týraly málimetter alýǵa bolady.
Sondaı-aq Máýlen Áshimbaev «7-20-25» baǵdarlamasy boıynsha salynyp jatqan jańa turǵyn úı kesheniniń qurylys jumystarymen tanysty. Naqty aıtqanda, ol Aqbulaq shaǵyn aýdanynda ornalasqan «Almaly» turǵyn úı keshenine baryp, turǵyndarǵa jańa baspanalarynyń kiltin tabystaý saltanatyna qatysty. Osy rette Almaty qalasy boıynsha 2018 jyly 1,9 mln. sharshy metr baspana nemese 15,1 myń páter paıdalanýǵa berý josparlanǵanyn atap ótken jón.
Partııa Tóraǵasynyń Birinshi orynbasary baspanaly bolǵan turǵyndardy quttyqtap, jańa baǵdarlama el ekonomıkasyna jan-jaqty áser etetin ıgi bastama ekenin aıtty.
– Búgin Elbasynyń bes áleýmettik bastamasy Almaty qalasynda nátıjeli júzege asyrylyp jatqanyna kýá boldyq. Munda jańadan salynǵan jataqhanalar sapaly ári jańa qondyrǵylarmen jabdyqtalǵan. «7-20-25» baǵdarlamasy boıynsha da shaharda júıeli jumys júrgizilýde. Úılerdiń sapasy da talaptarǵa saı. Sondyqtan Almaty qalasynda ár otbasyn baspanamen qamtýdy kózdeıtin bastama nátıjeli júzege asyrylýda deýge tolyq negiz bar. Osyndaı baǵdarlamalarǵa jastar kóbirek qatysýy kerek. Munyń barlyǵy Elbasy saıasatynyń jemisi. Aldaǵy ýaqytta da «Nur Otan» partııasy osy baǵyttaǵy óz jumystaryn qarqyndy jalǵastyrady, – dedi Máýlen Áshimbaev.
«Nur Otan» partııasy Elbasynyń tapsyrmasy boıynsha jańa áleýmettik bastamalardyń júzege asyrylýyna qoǵamdyq baqylaý júrgizýde. Jumys meılinshe ádil ári tıimdi bolýy úshin Respýblıkalyq qoǵamdyq keńes qurylyp, onyń quramyna elimizdegi jetekshi saıası partııalardyń basshylary, úkimettik emes uıym ókilderi, Qazaqstan halqy Assambleıasynyń músheleri, belsendi azamattar men sarapshylar endi. Osyndaı balamaly qurylymdar aımaqtyq deńgeıde de qurylyp, óz jumystaryn bastady.
Prezıdenttiń bes áleýmettik bastamasynyń júzege asyrylýyn baqylaý jónindegi Respýblıkalyq qoǵamdyq keńestiń kezekti otyrysy Almaty qalasynda ótti. Oǵan «Nur Otan» partııasy Tóraǵasynyń Birinshi orynbasary Máýlen Áshimbaev, Respýblıkalyq qoǵamdyq keńestiń tóraǵasy, Parlament Senatynyń depýtaty Baqytjan Jumaǵulov, Almaty qalasynyń ákimi, partııa qalalyq fılıalynyń tóraǵasy, partııa Saıası keńes bıýrosynyń múshesi Baýyrjan Baıbek jáne Keńes músheleri qatysty. Jıyn barysynda Almaty qalasynda bes áleýmettik bastamanyń júzege asyrylý máseleleri jiti talqylandy.
Otyrysty ashqan Baýyrjan Baıbek Memleket basshysynyń aýqymdy áleýmettik jobalaryn oryndaý boıynsha qalada atqarylyp jatqan jumystar týraly aıtty.
– Bes áleýmettik bastama – Elbasynyń salıqaly saıasatynyń negizi halyqqa jaǵdaı jasaý ekenin kórsetetin ómirsheń joba. Memleket basshysynyń bul áleýmettik reformalary turǵyndardyń naqty múddesin kózdeıdi jáne azamatttardyń ómirin túbegeıli jasqartýǵa baǵyttalǵan. Boljam boıynsha, endi 20 jyldan soń Almatyda 3 mln. halyq turatyn bolady. Sondyqtan bizdiń basty baǵyttarymyzdyń biri – qoljetimdi baspana salý. Búginde mundaı múmkindikti bizge prezıdenttik «7-20-25» baǵdarlamasy berip otyr. Qazirgi kezde respýblıka boıynsha berilgen barlyq ótinimniń 35 paıyzdan astamy Almatyǵa tıesili. Onyń ústine, qalalyq ótinishterdiń jartysy maquldanǵan. Bul – quny 6,1 mlrd. teńge bolatyn 480 páter. «Nurly jer» baǵdarlamasy boıynsha bıyl 6 myńnan astam páterdi paıdalanýǵa berý josparlanǵan. Bul ótken jyldan úsh ese kóp», – dedi Baýyrjan Baıbek.
Odan bólek, megapolıs basshysy Almatyda eski úılerdi renovasııalaý baǵdarlamasynyń qolǵa alynǵanyn, onyń ınvestısııalyq áleýeti 320 mlrd. teńge ekenin jetkizdi. Qazirgi kezde qalada myńǵa jýyq eski úıler bar, jaqyn arada jeke ınvestısııalardy tarta otyryp, olardyń ornyna 24 myń jańa úı salý josparlanǵan.
О́z kezeginde Baqytjan Jumaǵulov bes áleýmettik bastamanyń Almaty qalasy úshin mańyzy asa zor ekenin aıtyp:
– Almaty sońǵy jyldarda erekshe kórkeıip, elimizdiń ekonomıkalyq damýyna eleýli úles qosyp kele jatqanyna bárimiz kýámiz. Bul úlken ózgeristerdi qalanyń turǵyndary ǵana emes, qonaqtary da erekshe joǵary baǵalaýda. Jaqynda atqarylǵan jumystarǵa Elbasymyz eń joǵary baǵa berdi. Prezıdenttiń tapsyrmasyna sáıkes bes áleýmettik bastamanyń iske asyrylýyn baqylaý úshin Qoǵamdyq keńes quryldy. Bul – Elbasynyń «Nur Otan» partııasyna degen úlken senimi. Respýblıkalyq qoǵamdyq keńes ókilderi elimizdiń barlyq derlik oblystaryna baryp, bes áleýmettik bastama boıynsha atqarylyp jatqan jumystarǵa baqylaý júrizdi. Sondaı-aq Keńes el Úkimetimen de egjeı-tegjeıli jumys isteýde. Bastamalardy iske asyrý úshin memleket tarapynan barlyq qajetti jaǵdaı jasalyp, «Jol kartasy» bekitildi. Ondaǵy 36 tarmaqtyń 29-y búginde oryndaldy. Ortalyqta jáne óńirlerde júıeli jumys júrgizilýde. Halyq ta bastamalardyń mańyzyn tereń túsinip, qyzý qoldap otyr Jergilikti atqarýshy organdar da belsendi jumys isteýde, – dep atap ótti.
Al «Nur Otan» partııasy Tóraǵasynyń Birinshi orynbasary partııa tarapynan Elbasynyń áleýmettik bastamalaryn halyqqa túsindirý jáne júzege asyrý jumystary júıeli júrgizilip kele jatqanyn aıtty. Sondaı-aq osy baǵyttaǵy keıbir máselelerge nazar aýdardy.
– Halyq «7-20-25» baǵdarlamasy boıynsha alǵashqy jarnanyń kólemin tómendetý máselesin kótergeni belgili. Árıne, atalǵan jarnany birden alyp tastaýǵa bolmaıtyny túsinikti. Sebebi, páter alǵan azamattyń da jaýapkershiligi bolýy kerek. Osy máseleni sheshý úshin áleýmettik qaıtarymsyz kómek nemese prosentsiz kredıt retinde alǵashqy jarnanyń jartysyn jergilikti atqarýshy organdar tóleý týraly bastama aıtyldy. Osy usynysty «Baspana» ıpotekalyq uıymyna joldaǵan bolatynbyz. Olar soǵan sáıkes óz tetikterin daıarlady. Endi sol usynysty ákimdiktermen birlesip júzege asyrý úshin aımaqtyq fılıaldarymyzǵa joldaıtyn bolamyz. Osylaısha bul ıdeıany ortalyq jáne jergilikti deńgeıde jan-jaqty júzege asyrý jolynda júıeli jumys júrgizemiz, – dedi Máýlen Áshimbaev.
Budan basqa, basqosýda «Damý» kásipkerlikti damytý qory» AQ-nyń basshysy Dáýlet Ábilqaıyrov, «Baspana» Ipotekalyq uıymy» AQ-nyń basqarma tóraǵasy Qaırat Altynbekov jáne Halyqaralyq ınnovasııalyq tehnologııalar ýnıversıtetiniń rektory Damır Shynybekov sóz sóılep, óz usynys-pikirlerin bildirdi.