Ázaǵanyń kómekshi hatshysy

Avtobýstan túsken boıda Gýlııa zyr júgirip keledi. Baıaǵy sovmınniń aýrýhanasyna. О́kpe­sin qolyna alyp, ushyp keledi. Ázaǵańa! Jan­saq­taý bólimine túsip qalypty. Osy tań­erteń Almatyda Elbasynyń qolynan biraz zııalylar jyldyq stıpendııa­la­ryn alǵan bolatyn. Shyqqasyn habar­la­sa­myn degen. Qońyraýyn zaryǵyp kútken. Taǵaty taýsylyp balalarynan bilgen. Insýlt! Alty ret júrek talmasyna ushyraǵan zárezap aǵzany bul joly mıynan qysyp jiberipti... Ishke kirý ońaı bolmady. Jazýshylar odaǵynan Ázaǵańnyń alyp bergen: «Gýlııa Imanova – Á.Nurshaıyqovtyń kómekshi-hatshysy», – degen kýáligin kórsetip, jalynyp-jalpaıyp, 3 mınótke ázer suranyp kirdi-aý, áıteýir. Esik aıqara ashylǵanda Gýlııa shatqaıaqtanyp, denesin us­taı almaı táltirektep ketip edi, dáriger qoltyǵynan demep, tiktep qaldy. Bul ne ózi? Qaıda kelip tur? Myna jat­qan kim? Ázaǵańa uqsaı ma? Bet-aýzyn túrli tútiktermen aıqushtap tańyp tastaǵany nesi? Kózi jumýly. Aqyldy kó­zi­nen nur shashyramaıdy... Keń mańdaıy jarqyrap ja­tyr. Shapshań, shalt qımylmen qolymen sıpap edi, jup-jum­saq, jyp-jyly eken. Ernin tıgizbekke eńkeıdi bilem, dári­ger tejep qaldy. Alyp júregi soǵyp tur ma eken? Keýdesin tyńdasa she? Taǵy tosqaýyl. Monıtorǵa kózi túsip edi, on­daǵy oınaqshyǵan sansyz ırek: «álsiz, álsiz», degendeı, shap­shyǵan shımaılarymen úreı­in ushyryp jiberdi. Eńi­rep qoıa berdi. Mundaıda jy­laýǵa bolmaıdy ǵoı. Jylaýdy surap alyp pa? Jylady... Syrtqa shyqqan soń qaraǵaı baýyryna tyǵylyp otyryp, aǵyl-tegil eńiredi... Munyń kóz jasy aǵa júreginiń qylyn terbep, álsiz tamyrlaryna qan júgirtse eken-aý... Ázaǵań eshnársege de ońaı­lyqpen berilmeıtin. Búkil ǵu­myry qıyndyqty jeńýge ar­nal­ǵandaı edi. Ashtyq jyl­da­ry­nyń zobalańyna bala jú­regi shydap baǵypty. Tut­qıyl­dan soqqan soǵys ala­paty. Aıdahar aranyna ju­tyl­maı aman oraldy. Kýrs­taǵy otyz qyzdyń qara nanyn kezek bólip jep júrip, bilim aldy. Laýazymdy qyzmetter atqarǵan tustaǵy etekten tart­qan mysyqtileýlerdiń mysyn ádildikpen basa bilipti. Mahabbat jyrshysy atandy. Halqynyń súıikti jazýshysy boldy. Halımasynan 80 jasqa endi súıenerde kóz jazyp qal­dy. Kári júrektiń syńarynan aıyrylǵandaǵy syńsyǵa­ny­nan beter jandy qaryr nendeı úskirik-ún kezdeser eken? Jo-joq, kezdespes... Qaıǵy qaqpaqylyna mazaq bolyp qalypty. Balalarynyń qansha mamyq áldıine úıren­ge­nimen de jetim kóńildenip, boıy-basynan ál-qýat ysy­ry­lyp, saly sýǵa ketkendeı sal­dyraı bastaǵanyn ózi sezedi. Qalam ustaıdy, jazylmaıdy. Oıy kóp, iske tamyzyq joq. Basylatyn, qaralatyn qol­jaz­balar shash-etekten. Buryn Halıma ekeýinen eshteńe ar­tyl­maýshy edi. Báriniń qııýy qashqandaı. Onyń ústine Ha­lımany oılaýmen osharylyp, opyrylatyn túri bar. Bátir-aý, qalaı serpiledi? Isi qalaı ónedi? Jan kúızelisiniń bir emi – oıǵa alǵan sharýasynyń jeldirtip júrip berýi emes pe edi. Bir jóni bolar ma? Qı­sy­ny keler me? Halımasyndaı kim qolyn uzartar... Jár­demshi bolar, júıkesin jegideı jeıtin jumysyn kim júıelep, jeteleı túser... Sóıtip, oıy-boıyn muń torlap, qaradaı shóge bastaǵan tusta, 2005 jyly Aqtóbeden qońyraý shalyndy. Áıel bala eken. Kóp oqyrmandarynyń biri. Gýlııa Imanovamyn dep tanystyrdy. «Máńgilik mahabbat jyryn» oqyp, jyly lebizin bildirip jatyr. Daýy­sy ashyq. Telefonnyń arǵy jaǵynan júregi kórinip tur­ǵan­daı: búkpesiz jan ekeni seziledi. О́z halin suraǵanda, nege ekeni belgisiz, Ázaǵań birden jan syryn jaıyp saldy. Halıma bylaıǵy tirshiligin aıtpaǵanda, ádebı ómiriniń sham­shyraǵy eken-aý. Eriniń to­lassyz jazýynyń etek-jeńin qymtap, halqynyń ká­de­sine úlgertip jatatyn súıik­tisiniń jankeshtiligin endi jete uǵyna bastaǵandaı ma? Qa­zir japanda jalǵyz jorytqan qulandaı eken. Eleńdeıdi. Erin­begenimen de eleń etkizerlikteı shyǵarmalar týmaı qoıdy. Qaıda, qaıda, baıaǵy tulpar-aǵyn? Qaıda eken, janqalqasy – Halıma-saǵym?! О́nbeı tur, bar jumysy. Kúı­zelgendeı bar turmysy. Osy qınalysy Gýlııaǵa salmaq sal­ǵanyn sezgendeı edi. Onyń daýy­sy barlyǵyp shyǵyp, álde kómeıge tyǵylǵan óksik pe, úni úzilip-úzilip álsirep, báseńdene óshe túsip, qaıta serpilgendeı qýatpen Almaty­ǵa bir barǵanda ádeıilep aǵa­syna sálem beretinin syz­dyqtap jetkizdi bilem. «Kompıýterge jaqsy basamyn», degeni jazýshynyń kókeıinde álsiz shoqty úrlep, mazdatqandaı boldy. Sol Gýlııa Ázaǵanyń kabınetinde otyr edi. Jaǵalaı kitap. Munsha mol baılyqty sırek ushyratypty. Ertegi ále­mi­ne engendeı. Kórkem úlkeı­tilip, tórge ilingen Halıma apasynyń sýretine kózi túsip ketkende, ón boıy shym ete qaldy. «Qyzym-aý, meniń Ázil­hanyma qolǵabys etshi»,– dep úkili úmitpen jymııa­tyn­daı. Dál osy tusta áńgime aýa­ny da órbı kele, bir sheshimniń shetin ańǵartyp turǵandaı-tyn. Ne istemegin oısha saralap otyrǵan Gýlııa, álgi kóz­qarastan berik baılamǵa tirelgenin, endi sheginerge jol joq ekenin ańǵardy. Syrttaı ty­myraıyp otyrǵanymen, «ıá, ıá, Halıma apataıym, kómek­tese­min, kómektesemin», – dep ishteı Ázaǵań ótinishin qana­ǵat­tandyryp tastaǵanyn baı­qa­maǵandaı. Úlken jazýshy­nyń úlken júregi ańǵarympaz ǵoı: «sóıtkeniń jón, eńbegińdi jemespin», degendeı, ózine dál qazir yqylasty sóz ar­na­laryn oı túısigimen ekshegen Ázaǵań qarlyǵashtaı qaǵylez óńdi Gýlııanyń jaýabyn tezdetip estýge qumarlanǵandaı elgezek qalyp tanytty. Endi ne shydas bar? «Sizge járdemim tıip jatsa, baqyttymyn, aǵa!», – dep Gýlııa jazýshynyń qoshemetshil kóńilin aspan­datyp jiberdi. Sodan, Gýlııa balalaryn eritip, Aqtóbeden Almatyǵa kóship kelgen. Endigi ómirin Á.Nur­shaıyqovtyń kómekshi-hatshysy bolýǵa arnap, halyq jazýshy­sy­na dem berý, qol­jaz­basyn basyp, kitap qyp shyǵarý. Áı­teýir, zyr júgirip, túgesil­meı­tin ádebı sharýasyn túgendeýdi murat etti. Ázaǵań ystyq yqy­laspen qaryn­da­sy­nyń qolyn qysyp ustap, bul sheshimine meıirimmen alǵy­syn aıtyp tur­ǵanda: «Moı­ny­ńa qandaı qamyt kıdiń, Gýlııa!» – dep ózin-ózi nyq qa­damǵa qaqpaqyldaǵany da esinen ketpes. Jebedeı sýyrylǵan ýa­qyt­qa ne shara? Araǵa alty jyl túsipti. Gýlııanyń eńbe­gine Ázaǵań emirenip júrdi. Aıt­qanyn eki etpeıtin, eńbek­shil kómekshisine ámanda rıza­shylyǵyn bildiredi. Isi de óndi. Barshasyn tizbelep jat­paı-aq, 2010 jyldyń ózinde ǵana 12 kitaby baspalardan shyq­qanyn aıtsaq, bári uǵy­nyqty bolar. Gýlııa kómek­tes­pese, bulaı bolmasy anyq. Onysyna buldanbaıdy da. Jazýshy men oqyrman arasy­na dáneker bolsa, dittegeni sol ǵoı. Memlekettik tapsyrys­tan tys shyqqan kitaptardy taratyp, satýdyń mashaqatyn aıtpańyz. Shynashaqtaı Gýlııa bárine úlgeredi. Aqshasyn esep­-shotqa quıdyrtady nemese qolma-qol alyp, ıesine tabystaıdy. Sondaı bir kiristi keshte: – Baıyp ketetin boldym ǵoı, Gýlııajan!- dep Ázaǵań jazýyn doǵaryp, kompıýterde otyrǵan kómekshisin de sál ty­nystaýǵa shaqyryp, áziline bas­ty. – Baıyp ketsem, saǵan balalaryńmen birge keń orny­ǵatyn páter ápersem deımin... – Qıyn soǵady sizge. Júregińizge kúsh túsedi!– dep Gýlııa azar da bezer boldy.– Kúnimdi kórermin. Balalarym ósse, teńelip ketermin. Ja­zýy­ńyzdan basqaǵa esh alańdamańyzshy. – Sonda da bir jónin qarastyrýym kerek shyǵar, – dep Ázaǵań jaldaýly páterde turyp jatqan kómek­shisi­ne jany ashı qarap qoıdy. Keıde eńbegine durys tóleı alyp júrmin be dep te kúmandanatyn. Aqysyn jemeýge tyrysady. Páter demekshi, Úkimet basshysyna joldana­tyn ótinishiniń sulbasy da kókeıinde júr. Belgili jazý­shy­larǵa aqyly ádebı kó­mekshilerdi bekitip berý memleket tájirıbesinde bar ǵoı. Uly Jambylǵa, bertinde Qa­sym Qaısenovke degendeı. Jasamys bizderge de múmkin etiler degen oıy oıanǵan. Solaı bola qalǵan kúnde osy Gýlııany kómekshi-hatshy­lyq­qa zańdastyryp, bekitip alar edi. Bul syryn ázirge Gýlııaǵa aıta qoıǵan joq. Kómekshi etip ustaýdy aýyrsynyp júrgen­deı bolmaıyn dep, tejelgen túri. Biraq kókeıkestilik bu­ǵyp qalmaıdy eken. Kún­der­diń kúninde álgindeı ótinish-hatty Gýlııanyń óz qolymen tergizip, joǵary jaqqa salyp jibergen. Resmı emes hatshy­synyń azdaǵan qarsylyǵyna qaramastan, árıne. Jaýapty alańkóńilmen kútken. Áli de kúte túskisi keledi. Kúder úz­beıdi. Dámeli. Sabyrly qal­py­nan ishindegi tylsym syryn ańǵarý qıyn. Tulǵalar bul jaǵyna turlaýly bolady eken ǵoı. Ishin órtese de ór keýdesin ushqalaqtyqqa basqyzbaıdy. Aýrýhanadan qaıtyp kele jatyp, jýan qaraǵaıdyń baý­y­rynda solyǵyn basqan Gýlııa shıraq qımyldaıdy. Jyla­ǵan­nan dáneńe ónbesin oılap, Ázaǵańnyń tezirek aıyǵyp ketýin Jaratqannan jalbyryna surady. Júrekke túsken sal­maqtyń talaı quqaıyn kórgen edi, turyp keterine sendi. So­ǵys qaqtaǵan taramystaı bol­mysy qaıyspaıtyn shyǵar. Jo-joq, essiz jata berýi múm­kin emes. Essiz jatqanyn sezse, ekilene túsip, atyp turyp keter edi. О́z kúıi ózine beımálim-aý, sirá. Áıtpese... Ázaǵań rýhy myqty adam ǵoı, maıyspas edi taǵdyr tálke­gine. Átteń-aı, átteń, ınsýlt alǵanyn bilmeı jatyr-aý! Osyn­daı kúdikti de sezikti, tentek te tákkappar oılar Gý­lııany dedektetip keledi. Úıine jetip ál jınap, erteń aýrýhana aldynda tań atyrýy kerek... Tań eleń-alań kez. Dári­ger­ler aýysymy. Aq jeleńdi­ler­den appaq eles tarap jatqan­daı. Zyr júgirgen olarǵa qa­rap otyryp, Gýlııanyń basy aınalsyn. О́mir arashashylary ǵoı, tynym tappaıdy. Qaı­sy­biri jansaqtaý bólimindegi Áz­aǵańa da baryp, dáıek bolyp jatqan shyǵar. О́zi de kirgisi kelgen. Jolatpaıdy biraq. «Ázaǵa, turmys kúndelik­teri­ńizdiń ara tisindeı qaıshy­lan­ǵan myna tusyn basa bereıin be?» – dep qulaǵyna sybyr­latsa ǵoı maǵan, estı qalsa, ushyp turar edi-aý. Oı shirkin jelikpe ǵoı, keı sátte. О́tken joly kúndelik qoljazba­la­ryn basyp otyryp, Gýlııa: «Bul jerin jumsartsaq qaı­tedi? Aty-jónimen badyraı­typ, betine basyp aıtypsyz. Keıin bálesine qalarsyz. Ol attan túskenimen, áli kúngi áldiniń biri emes pe?» dep, saqtyq jasaǵan. Ázaǵań qara kózildirigin alyp, jańa kór­gendeı ózine janaryn tiktesin. Únsiz. Abdyrap qalǵan Gýlııa jer shuqyp otyr. Aǵattyq jasady-aý. Ne túrtti, jaz­ǵanyn túzetpek bop. Keıde sózge, sóılemge qatysty pikirin ashyq aıtqyzyp, «e, kelistik» dep, erkindik berip qoıa­tyn keńdigi bolýshy edi, soǵan dandaısyǵany ma? Bul jolǵy belsendiligin belden syzyp tastaǵandaı etip: «Jazyńyz! Jazyńyz!» – dedi. Kózildiri­gin qaıta kıdi. Mátin sol kúı­in­she basylǵan. Batyl oılary batpan júgimen kete barǵan. Ázaǵańnyń azamattyq kóz­qa­rasyn ózgertý múlde múmkin emes edi. Durys dep bekindi me, qyldaı qııanat jasat­paı­tyn. Jurt kóńilin aýlaǵysh edi. Artyq sózben júregin syzdat­paıtyn. Qatty bekemdenip, ish­teı turysqanymen de lezde jibip, kiri ketken jibek oramaldaı tap-taza bop, jelbirep shyǵa keletin. Birde óziniń jazǵanyn aýyzsha aıtyp tergizip bolǵan soń, ústel ústine tildeı qaǵaz­dy eleýsizdeý qaldyryp, ty­nys­taýǵa shyǵyp ketken eken. Gýlııa ózine arnalǵanyn bilip, oqyp kórdi. «Sozsam – qolym­syń, Júrsem – aıaǵymsyń, Súıensem – taıa­ǵym­syń, Gýlııa! Buryn osynyń bári – Halıma edi. Aıyrylyp odan Qasiret jutyp, Qaıǵy jedim. Sen maǵan, Onyń ornyna, Kók­ten túsken Halıma ma dedim?!» Mátinniń aıaǵyna jetpeı-aq be­ti­niń ushy narttaı bop qyzar­dy. «Uıat-aı! Meni Halıma apaıǵa teńeı­tindeı sonsha nendeı eńbegim sińipti. Uıat-aı!», dep qalǵan sózderdi qoma­ǵaı­la­na oqyp shyqty: «Sen meniń: Halımamdaı, Qyzmet etip ke­lesiń. Boıdaǵy kúsh-qýatyńdy, Aıamaı maǵan beresiń. Qanshama kitaptarymdy kompıýterge bas­­tyń, olardyń korrek­týra­syn oqydyń. Shyqqan kitap­tardyń satylýyn, taraty­lýyn tegis uıymdastyrdyń. Ja­ryq kórmeı jatqan dú­nıelerimdi retke keltirsem dep jáne tal­py­nasyń. Seniń osy jaqsylyq­taryńdy, Qa­shan, qalaı ótesem eken, Gýlııa?!» Sońǵy sózderdi qoma­ǵaı­lanyp jutyp qoıǵanda, esikten Ázaǵań kórindi... Kút­pe­gen baǵaǵa keýili kóterilmek or­nyna, pástenip qalǵan qaryn­dasynyń myna túrinen kóp syr ańǵarǵan sezimtal ja­zýshy jyly janaryn aýdaryp, «sen adal eńbek ıesisiń, ra­zymyn kómegińe» degen lebizin tótesinen ańǵartyp ótip edi... Bir sát Gýlııa osyndaı shytyrman oılarynan selt etip: «Esin jıdy ma eken, asyl aǵam!» dep bosaǵan kó­ńilin áreń tejedi. Ushyp tu­ryp, qarsy betten kóringen tanys dárigerden hal-jaıyn bilip edi, ol sózge zaýyqsyz, pás kóńil, jaýapsyz júre berdi... Syrqattyń kóńilin su­ramaqqa kelgenderdiń qarasy lezde kóbeıip ketti. Iri oqy­mystylar, belgili aqyn-ja­zýshylar, qatardaǵy oqyr­mandar... Ul-qyzdary Arnur men Jannur, Jannat pen Janar tomsyraıyńqy kúıde. Kelinderi men nemereleriniń de unjyrǵalary túsip júr. Bárin bir tilek biriktirip, úmitti kózderinen sharasyzdyq taby seziledi. «Jazylyp ketse eken...» dep únsiz egile túsedi. Et jaqyndarynyń bir-ekeýi ǵana ishke suranyp kire aldy. Basqalaryn mańaılatpaıdy. Osyndaı dúrbeleńmen besinshi tún jylystap óte shy­ǵyp­ty... Ázaǵań júregi uly shaı­qasqa kirgendeı, maıdan dala­synan maltyǵyp shyǵa almaı jatqandaı... Júzinen beti beri qaraǵandyq nyshany baıqal­maıdy. Kúızeltetini de osy... Altynshy kúni Gýlııa túske deıin Ázaǵań jatqan aýrý­ha­nanyń mańynda kóppen birge teńselip, júrdi de qoıdy. Tańnan beri nár syzǵan joq. Tábeti tartpaıdy. Esil-derti ishke enip, Ázaǵańnyń júzin bir kórý. Qaıdan jolatsyn. Sonda da dámelenedi. Amal­syz­dan «Kómekshi-hatshy» degen kýáligin kórsetedi. Bul sózdiń mánisine keıbireýi ta­ńyrqaıdy. Endi biri túsinis­tik­pen basyn shaıqaıdy. Kirgizse ǵoı, áldebir amanatyn alyp qalar ma edi... «Sóı­le­mese de ne demegin túsinem! Jiberińdershi, dárigerler! Uly júrektiń ısharasyz óshýi múmkin emes, aıasańdarshy meni!» – dep janaıqaıyn syrtqa shyǵarǵysy keledi. Ádep saq­taıdy. Ibaly keıippen, kóz sharasyn móldir jasymen jýady... Áldene bir kezde óz oıymen áldılenip ketedi. El­basynyń qabyldaýyna barýdan bir kún buryn, altynshy aqpanda Ázaǵań ekeýi tańǵy serýen jasaǵan. Abaı eskertkishine baryp, taǵzym etkeni kóz aldynan ketseıshi bir. Ys­tyq beınesi kirpigin qaqtyr­maı, kólbeńdeıdi. Áne, uly baba eskertkishiniń mármár ta­syn sıpalap, uzaq turdy. Ba­syn súıeıdi. Qulaǵyn qabyr­ǵasyna tosty. Beınebir aqyn júreginiń dúrsilin tyńda­ǵan­daı, siltideı tynyp qalypty. Bir kezde saýsaqtarymen aǵa­synyń saýyryn jeńil, erkeleı qaqqyshtaǵandaı bolyp: «Abeke, Almatynyń ústinen qarap tursyń ba? El-jurt aman, men erteń Prezıdenttiń qolynan stıpendııa alamyn. Arýaǵyńyz qoldaı júrsin!» – dep jan-syryn ashqandaı elgezektene sóıledi. Sosyn, nege ekeni belgisiz, qara kózil­diri­gin suq saýsaǵymen sál joǵa­ry ysyryńqyrap, náti, mólt ete qalǵan tamshysyn bildirtpeı súrtkisi keldi me eken, basyn kilt kegjıtip, Alataýǵa buryp aldy. Dáp bir Abaı men Alataýdyń órligin salystyr­ǵan­daı, tátti muńǵa batyp edi. Sol turysynda Gýlııaǵa, Áz­aǵań Kóktóbege, odan asyńqy baýraıdaǵy Keńsaı silemderine janaryn sıpaı qamshylap, oısha ólshem órnegin salyp, sıqyrly áýen tyńdaǵandaı, baq pen baptyń tamyryn bas­qandaı, ómirdiń mánin qunyǵa quptaǵandaı, tipti bir jutym aýanyń mańyzyn bezbendegendeı, beımálim kúıde balqyp pa, álde ótkinshiliktiń áýe­zin­de qalqyp pa, áıteýir, adam-ǵumyr elesindeı bop, beıkúná kúıde sál myzǵyǵandaı-tyn... Myna keıpi tańǵaldyrdy. Gýlııanyń sanasyn san órimdi shybyrtqy osyp-osyp jibergendeı boldy. Sóıtken Ázaǵań erte kúni, Elbasynyń qolynan stıpendııa alysymen, sút pisirim ýaqyt ótken soń, oqystan shalqalaqtap qulaı bergen. Ultymyzdyń birtýar azamaty, ımandy jan, jyly júrek, ystyq qaırat ıesi Muhtar Qul-Muhammed súıeı qalǵan qoltyǵynan... Qysylǵandaǵy tiregi qandaı myqty edi! Jyl boıyna, saıahatshydaı sergek kúımen úıinde otyra almapty-aý! 2010 jyldy aı­ta­dy. El-jurtyn aralaýdan shar­shamady. Tynym joq. Jel­dir­tip júrgisi kelip tura­tynyn Gý­lııadan jasyrmaıdy. Baıtaq Otanynyń tórt bu­ry­shyn adaq­taǵan shyǵar. Azıada alaýyn alyp, jastan beter jú­girip, shabytqa bólenip, sa­qyl­daǵan saryshunaq aıazda sań­qyldap sóılep turǵanyna qyzyǵa qaraǵan qalyń eli. О́skemenge ekinshi qaıtara bar­maqqa jı­nalyp, qol sómkesin bosaǵaǵa súıep qoıǵanyn da biledi. Boı jazyp júr eken-aý! Birge jú­reıik deıtin Gýlııaǵa. Janynan tastaǵysy joq. Bul syltaý aı­tady. Syrt kóz ne deıdi? Sóz­den aýlaq. Kómekshi-hatshyńyz bolyp, úıde is tyndyrsam bolar. Selteń júris sezik tý­dyrmaı qoımas... Sondaǵysy Ázaǵań­nyń abyroıy úshin de. Halıma apasynyń rýhyna berilgendik serti de. Taza, pák kó­ńildiń káýsaryn tunyq kúıinde ustaýǵa degen yqylasy shyǵar ózin saqtyqqa jeteleıtin. Iá, Gýlııanyń mundaı kirshiksiz tabıǵatyn Ázaǵań aıryqsha baǵalaıtyn. Sondyqtan da bolar, «bul meniń kómekshi-hat­shym» ǵoı dep, qasyna súısine ertip, anyǵynda qoltyqtap, súıenish etip, túrli toı-jı­yndarǵa barǵysy kelgende, Gýlııanyń aqylmen tartynǵan kóńilin syılap, jalǵyz jortyp, kete baratyn. ...Besinshi táýlikte, namaz­dy­ger shaqta Ázaǵańnyń ta­myr búlkili toqtady. Bul qaraly kún – 2011 jyldyń 12 aqpany bolatyn. ...Bıylǵy qazan aıynyń ortasynda, kómekshi-hat­shy­lyq mindetin áli bir sát toqtatpaǵan Gýlııa Imanova maǵan qońyraý shaldy. – Aǵa, jıendi boldym! Áz­aǵańdy joqtatpaıyn dep, ózińizden súıinshi surap jatqanym ǵoı! – dep úni bebeýlegende, ata-babam saltymen áserlenip aıtqanym: «súıinshiń bolady!». ...Ázaǵań bir aýnap túsken shyǵar! Qaısar ÁLIM. ----------------------------- Sýrette Gýlııa Imanova.