«Nur Otan» partııasy Tóraǵasynyń birinshi orynbasary Máýlen Áshimbaev partııa Astana qalalyq fılıalynyń kezekten tys HXVI konferensııasyna qatysty. Is-shara barysynda partııa qyzmetin jańǵyrtý aıasynda qolǵa alynǵan jobalar jáne Prezıdenttiń bes áleýmettik bastamasynyń júzege asyrylýyn qoǵamdyq baqylaý jumystary pysyqtaldy. Jıynda qaralǵan basty máselelerdiń biri fılıaldyń jańa tóraǵasyn saılaý bolǵanyn atap ótken jón.
Delegattardyń biraýyzdan maquldaýymen taıaýda ǵana Astana qalasynyń ákimi bolyp taǵaıyndalǵan Baqyt Sultanov partııanyń Astana qalalyq fılıalynyń tóraǵasy bolyp saılandy. Jańa tóraǵany quttyqtaǵan Máýlen Áshimbaev onyń qyzmetine tabys tiledi.
Sondaı-aq konferensııaǵa qatysýshylar Prezıdenttiń bes áleýmettik bastamasy men jańa partııalyq jobalardyń Astanada iske asyrylý barysyna nazar aýdardy. О́z sózinde partııa Tóraǵasynyń birinshi orynbasary 1 maýsymda ótken Saıası keńestiń keńeıtilgen otyrysynda Memleket basshysynyń «Nur Otannyń» shyn máninde naqty isterdiń partııasyna aınalǵanyn aıtqanyn jáne jańǵyrý aıasyndaǵy bastamalardy joǵary baǵalaǵanyn jetkizdi. Sondyqtan nurotandyqtar Elbasynyń artqan senimin aqtap, berilgen tapsyrmalardy múltiksiz oryndaýy tıis.
Atap aıtqanda, Prezıdenttiń bes áleýmettik bastamasynyń júzege asyrylýyna qoǵamdyq baqylaýdy kúsheıtýge erekshe kóńil bólinýi kerektigin aıtqan Máýlen Áshimbaev osy maqsatta respýblıkalyq jáne óńirlik deńgeıde Qoǵamdyq keńester qurylǵanyna nazar aýdardy.
– О́ńirlik Qoǵamdyq keńestermen júıeli ári turaqty keri baılanys ornaýy tıis. Sol arqyly biz atalǵan bastamalarǵa qatysty máselelerdi der kezinde anyqtap, olardy ókiletti organdarmen birlesip sheshýimiz kerek, – degen Máýlen Áshimbaev astanalyq fılıalǵa osy salada belsendi áreket etýdi tapsyrdy.
Jalpy, Astanada bes áleýmettik bastamany iske asyrýda nátıjeli jumys júrgizilip jatqanyn atap ótken jón. Sonymen qatar konferensııada Máýlen Áshimbaev partııa qyzmetin jańǵyrtý aıasynda qolǵa alynǵan jańa jobalardy júzege asyrý máselesine de toqtaldy.
– Qazirgi tańda partııa elimizdi sıfrlandyrý úderisine úles qosý maqsatynda birqatar tyń bastamalardy júzege asyrýda. Atap aıtqanda, balalarǵa baǵdarlamalaý, robot tehnıkasy jáne 3D modeldeý negizderin úıretetin IT-synyp ashý jobasyn qolǵa aldyq. Sondaı-aq halyqtyń sıfrly saýattylyǵyn arttyrý maqsatynda IT-ortalyqtar ashylýda. «Rýhanı jańǵyrý» baǵdarlamasy aıasynda otandyq kitaphanalardy jańǵyrtyp, zamanaýı bilim ortalyqtary retinde qaıta qurý isi de qarqyndy júrgizilýde. Partııanyń bastamasymen aýyldyq jerlerde aǵylshyn tilin úıretetin klýbtar qurylýda. Onda negizinen erikti jastar jumys isteıtin bolady. Odan bólek, mektep ashanalary men sport alańdaryn da qaıta jańǵyrtý úshin naqty jobalardy qolǵa aldyq. Osynyń barlyǵyn júzege asyrýda Astana qalalyq fılıaly da nátıjeli jumys isteıdi dep senemiz, – dedi Máýlen Áshimbaev.
«Tegin 1000 IT-synyp» partııalyq jobasy aıasynda jańa oqý jylynan bastap 85 IT-synyp óz jumysyn bastady. Olardyń 26-sy Astanada ashylyp, onda qazir 341 oqýshy bilim alýda. Biryńǵaı geoaqparattyq onlaın-servısin qurý, dástúrli kitaphanalardy jańǵyrtý jumystary da elordada nátıjeli júzege asyrylýda.
Venera Túgelbaı, «Egemen Qazaqstan»