Kenshiler astanasynda «Jaz energııasy» atty graffıtı sheberleriniń baıqaýy ótti. Kóshe sýretshileriniń bul saıysynda Qazaqstan men Reseıden kelgen 13 graffıtshi baq synady. Konkýrs sharty boıynsha úmitkerler baıqaýdy uıymdastyrýshy «Qaraǵandy Jaryq» kompanııasyna tıesili 27 transformatorlyq beketti bezendirdi.
Bıylǵy baıqaýdyń negizgi taqyryby «Astana – arman qala» boldy. Sonymen qatar, sýretshiler «Elektr qýaty qaýipti!», «Qııal álemi – men stıl syılaımyn», «Fýtboldan álem chempıonaty», «Qaraǵandy Jaryq» – 15 jyl birge» atty taqyryptar boıynsha da óz týyndylaryn qazylar alqasynyń nazaryna usyndy.
Konkýrs qorytyndysynda bas júldege Pavlodardan kelgen Vladımır Zýbko laıyq dep tanyldy. Baıqaýǵa bes birdeı jumys usynǵan graffıtshi sheberge Gran-prı júldesi ónertapqysh Nıkola Teslanyń portreti úshin berildi. Jeńimpazǵa qala ákiminiń alǵys haty men 150 myń teńgeniń sertıfıkaty tabys etildi.
Aıta keterligi, bul baıqaýda Kereký óńiriniń sýretshileri oljaly boldy. Gran-prı ıegeri V.Zýbkodan basqa Pavlodar óńirinen kelip qatysqan Rýslan Karımov pen Vasılıı Vdovın, tıisinshe birinshi jáne ekinshi júldelerdi jeńip aldy. Al kompanııa basshysy taǵaıyndaǵan arnaıy júlde Astana qalasynyń ókili Dıas Áýbákirovke buıyrdy.
Jergilikti «Qaraǵandy Jaryq» kompanııasy «Jaz energııasy» baıqaýyn 2011 jyldan beri dástúrli túrde uıymdastyryp keledi.
Qaırat ÁBILDA,
«Egemen Qazaqstan»
QARAǴANDY