Búgin Almatydaǵy Qazaq onkologııa jáne radıologııa ǵylymı zerteý ınstıtýtynda otandyq onkologııalyq qyzmettiń negizin qalaýshy, medısına ǵylymdarynyń doktory, professor Sáken Nuǵmanovtyń 100 jyldyǵyna arnalǵan Halyqaralyq ǵylymı-tájirıbelik konferensııa ótti.
Jıynda densaýlyq saqtaý vıse-mınıstri Lıazat Aktaeva Sáken Nuǵmanulynyń kásipqoılyqtyń kúrdeli mektebinen ótkenin ataı otyryp, ónegeli ómirbaıanyna toqtaldy.
Mańyzdy kezdesýde Májilis depýtaty Zaýresh Amanjolova, professor, QR UǴA akademıgi Tóregeldi Sharmanov, QR Densaýlyq saqtaý mınıstrliginiń bas onkology, onkologııa jáne radıologııa ǴZI dırektory Dılıara Qaıdarova, S.Asfendııarov atyndaǵy QazUMÝ rektory Talǵat Nurǵojın bastaǵan ǵalymdar men ataqty doktorlar qatysyp, osydan jarty ǵasyr burynǵy onkologııalyq qyzmettiń barysyna, onyń damý dańǵylyna toqtaldy.
Konferensııa aıasynda Nuǵmanovqa arnalǵan «Ýaqytty ozǵan» atty kitabynyń tusaýkeseri ótip, jınaqta QazORǴZI-dyń onkologııalyq qyzmettiniń qalyptasýy týraly, onyń hattary, ol týraly estelikter men maqalalar, sondaı-aq, basqa da qujattar jarııalandy. Kitapta usynylǵan mátinderdiń 97 paıyzy birinshi ret jáne fotosýretterdiń 99 paıyzy birinshi ret jaryq kórdi.
О́z kezeginde 1960 jyly Sáken Nuǵmanov Qazaq onkologııa jáne radıologııa ǴZI-dy qurdy jáne ony basqarǵanyn eske sala ketý kerek.
QazSSR Densaýlyq saqtaý mınıstrliginiń bas onkology retinde respýblıkadaǵy onkologııalyq qyzmettiń paıda bolýynyń basynda júrip qana qoımaı, Qazaqstandaǵy jáne Orta Azııalyq Respýblıkalardaǵy Orfarıngealdi isikterdiń epıdemıologııasy men patologııasyn zertteý jónindegi ınstıtýt bazasynda qurylǵan DDSU Birlesken zertteý ortalyǵyn basqardy. Keńes Odaǵynyń jáne álemniń jetekshi onkologtarymen tyǵyz seriktestik ornatty. Onkolog-dárigerlermen ǵalymdardan turatyn eren júırikter tobyn daıyndady.
Aınash ESALI,
«Egemen Qazaqstan».
ALMATY