Oblys ortalyǵyndaǵy «Jastar bastamalaryn damytý ortalyǵynda «2018-2020 jyldar aralyǵynda oblysta jas otbasylardyń ajyrasý kórsetkishin tómendetýge arnalǵan» taqyryp boıynsha dóńgelek ústelder jıi ótýde. Arnaıy baǵdarlama da jasalýda. О́ıtkeni, óńirde jastar arasynda ajyrasqandar sany kóbeıýde. Joǵarydaǵy málimet dabyl qaǵarlyq jaǵdaı.
Bıyl oblys ortalyǵynda turatyn otbasylardan ajyrasýǵa baılanysty 1287 talap-aryz túsipti. Talap-aryzdardyń 1254-i boıynsha azamattyq is qozǵalǵan. Sýdıanyń sheshimine sáıkes, 933 otbasy tipti, sot barysynda ajyrasqan. Qalǵan 300-den asa otbasy tatýlasyp, aryzdaryn qaıtaryp alǵan.
Al, oblys ortalyǵyndaǵy «Halyqqa qyzmet kórsetý ortalyǵy» ajyrasý jóninde sot sheshimine qarap, bar bolǵany 2 kúnniń ishinde nekeni buza alady eken.
Qalalyq sottyń sýdıasy Baqyt Sátıevanyń aıtýynsha, nekeniń turaqty bolýyna memleket múddelik tanytady. Sondyqtan da sottarǵa zań arqyly erli-zaıyptylardy tatýlastyrý jóninde sharalar qoldaný mindetteri júktelgen. Tatýlastyrý-otbasyn saqtaýdyń amaly.
Elimizdiń Joǵarǵy sot tóraǵasynyń ókimimen qolǵa alynǵan pılottyq joba boıynsha Talap-aryz sotqa kelip túsken kezde sýdıa taraptarǵa habarlama jiberip, daýdy medıasııa tártibimen aıaqtaý quqyǵyn túsindiredi. Taraptar kelisim berse, azamattyq is 10 jumys kúnniń ishinde toqtatylady.
Ortalyqtyń bastamashyl jastary «memleketimizdiń irgesiniń berik bolýy árbir otbasymen tyǵyz baılanysty ekenin» túsindirý maqsatynda arnaıy baǵdarlama boıynsha jumys jasaýda.
Farıda BYQAI,
«Egemen Qazaqstan»
Pavlodar