Jastar saraıynda qala turǵyndary úshin zań turǵysynan tegin keńester berildi. Bul respýblıkalyq aksııa Astana qalasy ákimdiginiń qoldaýymen «MEDIATOR KZ» kompanııasy ótkizdi, dep habarlaıdy ákimdiktiń baspasóz qyzmeti.
Is-sharanyń basty maqsaty - halyqty quqyqtyq turǵyda aǵartý. «Osyndaı sharalar halyqqa óte kerek. Bastysy adam óz quqyǵyn bilýi tıis. Zańdy bilmegen soń adamdar kóp qatelik jasaıdy, óz quqyǵyn da qorǵaı almaıdy, sol sebepti osyndaı sharalar óte qajet. Adam qandaı da bir isti nemese taǵy basqa dúnıeni júzege asyrmas buryn mamandarmen keńesýi kerek. Mysaly, zańdylyq jaǵynan bolsa, mindetti túrde zańgermen», - dedi respýblıkalyq aksııany uıymdastyrýshy, «MEDIATOR KZ» kompanııasynyń zańgeri Qazbek Nurmaǵanbetov. Tıisti mamandar úlestik qurylys, jer máselesi, otbasylyq zańnama jáne azamattyq quqyqtyń basqa da salalary boıynsha ár kelýshini jeke-jeke qabyldap keńes berdi. Is-sharaǵa «MEDIATOR KZ», «Bestavdocat» kompanııalarynyń sondaı-aq, Kókshetaý, Temirtaý jáne Esil aýdanynan arnaıy shaqyrylǵan zańgerler qatysty.
- Mundaı tájirıbeler jıi ótkiziledi. Ákimdik árqashan bizdi qoldap otyrady. Bul jerde maqsat paıda tabý emes, turǵyndarǵa óz quqyqtaryn bilý boıynsha keńes berý, eldi zań jaǵynan saýatty etý. Kóbinese adamdar óz quqyqtaryn bilmeı jatady, sol sebepti de ózderin qorǵaı almaıdy», - dep atap ótti «MEDIATOR KZ» kompanııasynyń zańgeri Maqpal Orazǵalıeva. Zańgerlerdiń aıtýynsha, adamdar kóbinese turǵyn úı jáne otbasylyq ister boıynsha keńes alady. Ekonomıkalyq jaǵdaı boıynsha ótinishter kóbinese boryshtyq jáne eńbek máselelerine tıesili. Sondaı-aq, murany qaldyrý nemese murany alý boıynsha keńes alýǵa keledi eken.
- Búgingi qabyldaýǵa óte razymyn, jyly qarsy aldy, meniń bar suraǵyma jaýap berdi. Men ózimshe, qaı suraqty qalaı sheshetinimdi ishteı sheship aldym. Aqyl-keńes zań turǵysynan bolǵan sııaqty edi, biraq bylaı qarap tursam psıhologııalyq turǵyda da bolypty. Siz bilesiz ǵoı, ár kásibı maman bir jaǵynan - psıholog. Men bul aksııany quptaımyn, jıi bolyp tursa da artyq etpeıdi», - dep óz oıymen bólisti sharaǵa kelýshi.