2019 jyly Qazaqstanda áýe bıletteriniń quny arzandaýy múmkin, dep habarlady Investısııalar jáne damý mınıstrligi.
Atap aıtqanda, búgin Parlament Májilisindegi Úkimet saǵatynda depýtattar áýe bıletteri baǵasynyń joǵary bolýy týrızmdi damytýǵa kedergi bolyp otyrǵandyǵyn atap ótti. О́z kezeginde QR Investısııalar jáne damý vıse-mınıstri Tımýr Toqtabaev bul baǵytta mınıstrlik tıisti jumystardy atqaryp jatqanyn aıtty. «Bizde balalarǵa, zeınetkerlerge, múmkindigi shekteýli jandarǵa, jastarǵa arnalǵan jeńildikter eskerilgen jolaýshylardy tasymaldaý erejeleri bekitilgen. Degenmen de, tasymaldaý qunyna qatysty másele áli de bar. Qazirgi kezde Energetıka mınıstrligimen birlese bizdiń ushaqtar parki úshin ózimizdiń avıakerosınmen qamtamasyz etý bóliginde tıisti jumystar júrgizilýde. Aldaǵy jyly tolyqtaı otandyq avıakerosınmen qamtý josparlanyp otyr. Meniń oıymsha, kelesi jyly ońtaıly nátıje baıqalady», - dedi T.Toqtabaev. Onyń aıtýynsha, bılet quny birneshe ındıkatorlar esebinen qalyptasady. Sonyń ishinde avıaotyn baǵasy negizgi kórsetkish bolyp otyr. Budan buryn habarlanǵandaı, Parlament Májilisinde týrıstik salany damytýǵa arnalǵan Úkimet saǵatynda Mádenıet jáne sport mınıstri Arystanbek Muhamedıuly elektrondyq vıza tetigi engiziletinin aıtty.