Osydan biraz ýaqyt buryn elimizdiń Mádenıet jáne sport mınıstrligi Týrızm ındýstrııasy komıtetiniń tapsyrysy boıynsha «Kazakh Tourism» Ulttyq kompanııasynyń uıymdastyrýymen Qazaqstan aımaqtaryna jasalatyn eń iri ekspedısııa retinde «Uly Dala Eline saıahat» jobasy qolǵa alynǵan bolatyn. Jańa týrıstik baǵyttardy jasaý úshin tabıǵı, tarıhı, kıeli mekenderdi zertteý, ishki týrızm men ınfraqurylymdy damytý maqsatynda uıymdastyrylǵan «Jańa Jibek joly» ekspedısııasynyń baǵytyn «QazaqGeography» respýblıkalyq qoǵamdyq birlestigi júzege asyrýda.
Ekspedısııanyń alǵashqy kúnderi 17 qyrkúıek kúni Almaty óńirinde bastalyp, munda ekspedısııa músheleri sol óńirdiń tarıhı qundylyqtarymen tanysqan edi. Endi «Uly Dala Eline saıahat» jobasy sheńberinde ótip jatqan «Jańa Jibek joly» baǵyty boıynsha ekspedısııa búgin tarıhı Taraz qalasyna kelip jetti.
Almaty qalasynan shyqqan ekspedısııa áýeli Taraz qalasynan qyryq shaqyrym qashyqtyqtaǵy «Aqyrtas» qalashyǵynda boldy. Ortasy úsh sharshy shaqyrymdy quraıtyn ortaǵasyrlyq kóne saraı kelýshilerdiń qyzyǵýshylyǵyn týǵyzdy. Budan bólek, ekspedısııa músheleri eki myń jyldyq tarıhy bar kóne Taraz shaharynyń tarıhymen tanysty. Ejelgi zamannan beri Uly Jibek jolynyń boıynda ornalasqan qalanyń qolónershiler men kópesterdiń qalasy bolǵany belgili. Munda sol kezde Eýropa men Azııanyń saýda joldary da toǵysqan. Tarıhtan belgili bolǵandaı, ártúrli basqynshylyq kezinde shahar birneshe ret buzylyp, qaıtadan qalpyna keltirilgen. Máselen Qarahan, Aısha bıbi, Dáýitbek, Babadja hatýn, Tekturmas keseneleri men Aqyrtas qalashyǵy, Qalı Júnis monshasy sııaqty tarıhı oryndar IýNESKO dúnıejúzilik muralar tizimine engen. Taraz tarıhymen tanysqan ekspedısııa músheleri budan soń oblys ortalyǵyndaǵy «Kóne Taraz» tarıhı-mádenı keshenine kelip, respýblıkalyq jáne jergilikti buqaralyq aqparat quraldarynyń ókilderimen kezdesti. Kezdesý barysynda atalǵan ekspedısııanyń jetekshisi Nurjan Alǵashov Taraz topyraǵynan alǵan áserimen bólisti. Qazaq tarıhy úshin Taraz qalasynyń oryny erekshe ekenine toqtaldy.
Sonymen qatar, Almaty óńirinen bastaý alǵan jalpy ekspedısııa jaıyn áńgimeledi. Ekspedısııa músheleri Almaty jerindegi Qazaqstan-Qytaı shekarasynda bolyp, Qorǵas beketine barar jolda Jarkent qalasyndaǵy erekshe meshitke soqqanyn, bul meshittiń eshqandaı shegesiz, Tıan-Shan shyrshasynan salynǵanyn aıtty. Al óz sózinde ekspedısııa dárigeri Álııa Qumarǵalına bul azamattardyń Kólsaıda bolyp, Qaıyńdy kólin tamashalaǵanyn, odan ary Aqtaý taýyna, Aıǵaıqumǵa, Shoqan Ýálıhanov bulaǵyna jáne Talhız qalashyǵyna barǵanyn áńgimeledi. Áńgime barysynda elimizdiń barlyq óńiriniń tarıhı shejirege toly ekenin, onyń ishinde Taraz topyraǵynyń erekshe ekenin atap ótti. Áýlıeata óńirindegi «Aqyrtas» qalashyǵyna alǵash ret kelip, áserlengen ekspedısııa múshesi Aıjan Jumataeva bul aımaqty týrıstik ortalyqqa aınaldyrý kerek dep esepteıtinin jetkizdi.
Saıahatshylardy bastap júrgen Nurjan Alǵashov sonymen qatar, elimiz boıynsha eń iri ekspedısııa aǵymdaǵy jyly 18 shildeden bastap 29 qyrkúıekke deıin 6 baǵyt boıynsha 6 mańyzdy klasterdi qamtı otyryp, elimizdegi mańyzdy tabıǵı nysandarǵa barý arqyly júrgiziletinin de aıtty. Ekspedısııa nátıjesinde elimizdiń tabıǵı nysandary boıynsha jańa týrıstik baǵyttar, sapaly foto jáne vıdeobankter qurylatyndyǵy sóz boldy.
Taraz qalasyna kelip, onyń tarıhymen tanysqan ekspedısııa músheleri budan soń Jambyl jáne Túrkistan oblystarynyń shekarasynda ornalasqan Aqsý-Jabaǵyly qoryǵyna bet aldy. Eki aptaǵa josparlanǵan saıahat barysynyń sońǵy núktesi Túrkistan oblysy bolmaq. Tájirıbeli saıahatshylardan, týroperator ókilderi men sheteldik jáne qazaqstandyq trevel-blogerlerden, sonymepn qatar «National Geographic Rossııa» komandasynan quralǵan ekspedısııa músheleri Túrkistan oblysynyń aýmaǵynda ornalasqan Otyrar, Saýran qalalary men Arystan bab, Qoja Ahmet Iаsaýı keseneleri sııaqty kóne tarıhı oryndarmen tanysatyn bolady.
Hamıt Esaman,
«Egemen Qazaqstan»
Jambyl oblysy