2013 jyly Keden Odaǵy komıssııasy qabyldanǵan “Lıftilerdiń qaýipsizdigi týraly” tehnıkalyq reglamentke sáıkes qyzmet kórsetý merzimi ótip ketken jedel satylardy 2020 jylǵa deıin jańasyna aýystyrý mindeti tur.
Búginde óńirdegi ónerkásiptik nysandarda 74 lıft tirkeýge alynsa, olardyń 14-i jańalanǵan. Qalǵandary eskirgen, tozyǵy jetken, paıdalaný ýaqyty ótip ketken. Aralarynda qoldanylý merzimi shırek ǵasyrdan asqan qondyrǵylar da bar. Júrgizilgen monıtorıngtiń nátıjesi boıynsha 8 kásipkerliktegi lıftterdiń tehnıkalyq talaptarǵa saı emestigi anyqtalǵan. Bul olqylyqtar eki aıdyń ishinde túzetilmese kishi kásipkerlikterge – 30, orta kásip ıelerine – 50, al iri bıznes nysandaryna – 100 aılyq eseptik kórsetkish kóleminde aıyppul salynady. “Tımırıazev elevatory” seriktestigi qondyrǵyny aýystyrýdyń jobalyq qujat daıyndap, rásimdeý sharalaryn aıaqtapty. О́nerkásiptik lıftilerdiń 14-i oblys ortalyǵynda, 60-y aýdandarda ornalasqan.
Kópqabatty turǵyn úılerdegi jedelsatylardyń jaıy da syn kótermeıdi. 338 lıftiniń basym bóligi ótken ǵasyrdyń 80-shi jyldary ornatylypty. Qoldanylý merziminiń aıaqtalýyna oraı osydan 10 jyl buryn jańartylýy tıis bolǵanymen, áli kúnge deıin paıdalanylyp keledi. Ábden esirgen mundaı qondyrǵylardyń sany–178.
Búginge deıin lıftilerdi jańartý “Turǵyn úı kommýnaldyq sharýashylyqty jańǵyrtý” baǵdarlamasy aıasynda júzege asyrylyp, 2011 jyly – 5, 2012 jyly – 14, 2015 jyly – 15 jedelsaty jańasyna aýystyrylǵan. О́kinishke oraı, sońǵy 3 jylda bul salada eshqandaı ilgerileýdiń joqtyǵy ańǵarylady. Bir lıfttiń baǵasy – 8 mıllıon, ornatýy – 3-4 mıllıon. Mundaı qarajatqa turǵyndar men páter ıeleri kooperatıvteriniń shamasy jete bermeıdi», deıdi ónerkásiptik qaýipsizdik salasyndaǵy memlekettik qadaǵalaý jónindegi departamenttiń ınspektory Maqsut Músáıipov.
Tıisti oryndar qoldanylý merzimi ótip ketken qondyrǵylar 2020 jylǵa deıin aýystyrylmasa, qoldanýǵa qatań tyıym salynatynyn eskertedi.
О́mir ESQALI,
«Egemen Qazaqstan»
Soltústik Qazaqstan oblysy