Byltyrǵy jyl basynan beri monopolııaǵa qatysty 34 zań buzýshylyq anyqtalǵan. Bul týraly Ulttyq ekonomıka mınıstrligine qarasty Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Astana qalasy boıynsha departamenti ótkizgen baspasóz máslıhatynda aıtyldy.
Komıtettiń elordalyq departamentiniń bólim basshysy Dastan Dýmanuly tergeýlerdiń qorytyndysyn jarııalady. О́tken jylǵy tárkilengen tabys pen aıyppul somasy 15 mln tenge shamasynda bolsa, bıylǵy jyldyń birinshi jartyjyldyǵynda bul kórsetkish 33 mln teńgege jetipti. D.Dýmanulynyń aıtýynsha, byltyr janar-jaǵarmaı quıý beketterinde suıytylǵan gazdy jáne AI-92, 95 benzıni men dızel otyn bólshek saýdada satý salasynda zań buzýshylyqtar oryn alǵan. Atalǵan tergeýlerdiń nátıjesinde naryq sýbektilerine qatysty ákimshilik ister qozǵalyp, ákimshilik jaýapkershilikke tartylyp, aıyppul salynǵan. О́tken jyly turǵyndar tarapynan Astana qalasyndaǵy áýejaı avtoturaǵynyń baǵasy qymbat bolýyna baılanysty shaǵymdar túsken. Tekseris nátıjesinde, avtoturaq baǵasy naryqtaǵy baǵadan 20 prosentke artyq ekendigi anyqtalǵan. Bul másele boıynsha tergeý júrgizilip, tıisti sharalar der kezinde qoldanyldy. Al bıyl kómirdi jáne gazgolderdi toltyrý úshin suıytylǵan gazdy bólshek saýdada satý boıynsha shıkilikter shyǵyp, tıisti sharalar qabyldanypty. Qala turǵyndarynyń basym kópshiligi elektr energııasynyń durys eseptelmeýine qatysty jıi shaǵymdanady eken. Aldaǵy ýaqytta túsken aryz-shaǵymdar boıynsha jumys júrgizilmek.
Erkejan AITQAZY,
«Egemen Qazaqstan»