Almaty oblysynda jyl basynan beri 310 mlrd teńgeniń aýylsharýashylyq ónimi óndirilip, salanyń kórsetkishi 2,6 prosent ósimge qol jetkizdi. Sondaı-aq aımaq ónerkásibindegi ónimdilik 556 mlrd teńgeni qurap, naqty kólem ındeksi 101,1 prosentke jetken. Al bólshek saýdadaǵy taýar aınalymynyń kólemi 7,2 prosentke ósip, 266,2 mlrd teńgeni quraǵan eken.
Qazir Jetisý topyraǵynda ósken kókónispen qatar, et, sút, qus ónimderine suranys joǵary. Ásirese úlken qalalardaǵy naryqqa jol tartqan ónimderdiń ótimdiligi baıqalady. Munyń bir dálelin jaqynda Astana qalasynda ótken Almaty oblysynyń kúnderi aıasyndaǵy jármeńkeden baıqaýǵa bolady. Eki kún ishinde Jetisý agrarshylary jalpy quny 270 mln teńge bolatyn 470 tonna aýyl sharýashylyǵy ónimin saýdalap úlgergen.
Jalpy, elordadaǵy «Qazaqstan» sport kesheniniń janynda ótken jármeńkege jurt kóp jınaldy. Astanalyqtarǵa usynylǵan azyq-túlik, kókónis ónimderiniń baǵasy arzan, sapasy joǵary bolǵandyqtan saýda qyzdy. Bul joly Almaty oblysynyń 17 aýdany men 3 qalasynyń sharýalary 17,0 tonna et ónimderin, 21,9 tonna sút ónimderin, 12,4 tonna balyq pen 106,1 tonna kókónis, 43,4 tonna jemis-jıdek jáne 43,3 tonna kartop ónimderin satty. Osylaısha, jetisýlyq sharýalar eki kún boıy ótken jármeńkede 48 túrli ónim saýdalap, elorda turǵyndarynyń suranysyn qanaǵattandyrdy.
Qalmahanbet MUQAMETQALI,
«Egemen Qazaqstan»
Almaty oblysy