Ál-Farabı atyndaǵy QazUÝ básekege qabilettiligin arttyrý men álemniń 200 úzdik ýnıversıtetteriniń quramyna ený maqsatynda ári Memleket basshysynyń tapsyrmalaryn júzege asyrý baǵytyndaǵy belsendi jumystardy jolǵa qoıǵan. Ýnıversıtettegi oqý baǵdarlamalarynyń 90%-y halyqaralyq agenttikterdiń akkredıtasııasynan ótken. Al birqatar oqý baǵdarlamalary «EUR-ACE® Label» eýropalyq sapa belgisin ıelengen. Qos dıplom júıesi boıynsha jetekshi sheteldik joǵary oqý oryndarymen 70-ten asa baǵdarlamany júzege asyryp otyrǵan birden-bir ýnıversıtet. Jyl saıynǵy esepti kezdesýi barysyneda osyndaı kórsetkishtermen bólisken Ulttyq ýnıversıtet rektory Ǵalymqaıyr Mutanovtyń aıtýynsha, úzdik JOO qataryna iligý elimiz aımaqtarynyń damýyna, ekonomıkanyń jetekshi salalaryn bilikti mamandarmen qamtamasyz etýge múmkindik beredi.
Osy derekterdiń qatarynda ýnıversıtet basshysy ǵalymdar ujymynyń, oqytýshylar quramy jáne stýdentterdiń aldynda turǵan strategııalyq mindettter týraly egjeı-tegjeıli baıandap berdi. QazUÝ álemdik deńgeıdegi zertteý ýnıversıtetine transformasııalaný baǵytymen maqsatty túrde kele jatqany atalyp ótti. Bıyl ýnıversıtet QS halyqaralyq reıtıngisinde taǵy da alǵa jyljyp, álemniń eń úzdik joǵary oqý oryndary arasynda 220-orynǵa ıe boldy. Bul topqa TMD elderinen QazUÝ men Lomonosov atyndaǵy MMÝ engen.
Ekonomıkany jańǵyrtý jáne óndiriske mamandardy daıarlaýǵa baǵyttalǵan 4.0 memlekettik damý baǵdarlamasy aıasynda osy oqý jylynda ýnıversıtette «E-kommersııa», «Sandyq lıngvıstıka», «BIG DATA», «Jasandy ıntellekt», «Geoınformatıka», «Internet buıym», «Bıoınformatıka» jáne t.b. jańa bilim berý baǵdarlamalary engizilip otyr. Sondaı-aq, AHQO jáne Benhalıf Ýnıversıtetimen (Katar) birlese ıslam qarjysy jáne bankıng boıynsha baǵdarlamalar engizilýde. Aǵylshyn tilinde 162 mamandyq oqytylady.
Ýnıversıtet aldyńǵy qatarly tájirıbeler ortalyǵyna, ınnovasııa men naqty óndiristiń, ǵylym men bilimniń ortaq transfertine aınalýda. Iri joǵary tehnologııalyq korporasııalar ýnıversıtettiń zertteý jáne bilim berý jumystaryna qarqyndy atsalysady. «Hewlett-Packard», «Cisco», «Konisa Minolta», «Fujitsu», «Samsung», «Alcatel», «Microsoft», «Laboratorııa Kasperskogo», «Huawei», «SAP» jáne t.b. álemdik kompanııalardyń 16 ǵylymı bilim berý ortalyqtary sátti jumys atqarýda.
Osy kezdesýde ýnıversıtet rektory BAQ ókilderiniń, oqytýshylardyń, stýdentterdiń jáne ata-analarynyń suraqtaryna jaýap berip, usynystar boıynsha arnaıy nusqaýlar jasaldy.
Elvıra SERIKQYZY,
«Egemen Qazaqstan»
ALMATY