Atyraý oblysynyń ákimi Nurlan Noǵaevtyń tóraǵalyǵymen sybaılas jemqorlyqqa qarsy kúres jónindegi oblystyq komıssııanyń kezekti otyrysy ótti, dep habarlaıdy Atyraý oblysynyń О́ńirlik kommýnıkasııalar qyzmeti.
Kún tártibinde sybaılas jemqorlyqqa qarsy is-qımyl jáne memlekettik qyzmetshilerdiń etıkalyq kodeksiniń saqtalýyn qamtamasyz etý sharalary talqylandy.
Atyraý oblysy boıynsha Memlekettik kirister departamentiniń basshysy Erlan Janbaev jáne Quqyqtyq statıstıka jáne arnaıy esepke alý komıteti departamentiniń bastyǵy Nurlan Ahmetbaev oblys basshysyna esep berdi.
Baıandamashylar sybaılas jemqorlyqtyń aldyn alý sharalary, memlekettik qyzmet salasyndaǵy baqylaý, sondaı-aq memlekettik qyzmetterdiń sapasyn arttyrý jónindegi sharalardyń taldaý nátıjelerin jarııalady.
- Biz sıfrlandyrýdy engizýge erekshe nazar aýdaramyz. Qazirgi ýaqytta memlekettik kiris organdarynan memlekettik qyzmettiń 48 túri usynylyp otyr. 26 qyzmet túri «Azamattarǵa arnalǵan Úkimet» memlekettik korporasııa arqyly júzege asyrylady. Sonymen qatar, qaǵaz formatynda usynylatyn 14 memlekettik qyzmetti elektrondyq formatqa aýdarý boıynsha jumystar júrgizilýde, - dedi Atyraý oblysy boıynsha Memlekettik kirister departamentiniń bastyǵy Erlan Janbaev.
Aımaq basshysy memlekettik kiris organdarynyń atqarǵan jumysyna oń baǵa berip,óńirde memlekettik organdar men halyq arasynda tikeleı baılanys ornatý boıynsha aýqymdy jumystar júrgizilip jatqanyn atap ótti.
- Elbasynyń tapsyrmasy boıynsha , memlekettik organdardyń jurtshylyqpen keri baılanys ornatý jumysy júrgizilýde jáne barlyq deńgeıdegi basshylar azamattardy jeke qabyldaıdy. Sonymen qatar, áleýmettik jelilerde Telegram jáne ACQ qosymshasy belsendi jumys isteýde.Olardyń árqaısysynda 3000-3 500 adam tirkelgen, barlyq ótinishter jan jaqty qarastyrylyp, sodan keıin halyqpen tikeleı baılanysqa shyǵady,- dep málimdedi Nurlan Noǵaev.
Ákimshilikter shaǵymdardy qabyldap, jaýaptaryn jiberedi. Bul bastama jaqsy nátıjelerin kórsetýde.
Atyraý oblysynyń ákimi barlyq memlekettik organdardyń basshylaryna halyqtyń shaǵymdary men ótinishterine ýaqtyly jaýap berýdi, kún saıyn usynylatyn memlekettik qyzmetterdiń sapasyn arttyrýdy tapsyrdy.