Halyqaralyq tennıs federasııasynyń (ITF) Londondaǵy shtab-páterinde 2019 jyly ótetin Devıs kýbogynyń irikteý týrnıriniń jerebesi tartyldy.
Aıtýly jarysta Qazaqstannyń tennısshileri Portýgalııa men OAR nemese Slovakııa men Belarýs quramalary arasyndaǵy básekeniń jeńimpazymen kezdesedi. Osy tórttiktiń arasynan eń qaýipti qarsylas – Slovakııa. Sebebi, bul eldiń Mark Klıjan (№49), Lýkash Lasko (№77) jáne Iozef Kovalık (№84) syndy úsh saıypqyrany ATR reıtıngindegi «TOP-100» oıynshynyń qataryna enip otyr. OAR-dyń sapynda da óte azýly tennısshi bar. Ol – álemniń toǵyzynshy raketkasy Kevın Anderson. Portýgalııa Joao Soýzaǵa senim artady. Ol úzdikter tiziminde 50 oryndy ıelenýde. Al Qazaqstannyń eń myqty oıynshysy Mıhaıl Kýkýshkın ATR reıtınginde 87 oryndy enshileýde.
Osy komandalar arasynan naqty kimmen kúsh synasatynymyz qazan aıynyń aıaǵynda anyqtalady. Básekelerdiń ózi kelesi jyldyń 1-2 aqpan aralyǵynda ótedi. Eger jerlesterimiz sheshýshi matchta jeńiske jetetin bolsa, onda Devıs kýbogynyń negizgi dodasynda kúsh synasý qurmetine ıe bolady.
Ǵalym SÚLEIMEN,
«Egemen Qazaqstan»