Kezdesýde taraptar álemdegi qalyptasqan jaǵdaıǵa baılanysty saýda-ekonomıkalyq yntymaqtastyqty damytýǵa qatysty pikir almasty, sondaı-aq 2020 jyly Astanada ótetin Dúnıejúzilik saýda uıymynyń HII Mınıstrler konferensııasyna daıyndyq barysyn talqylady, dep habarlaıdy Aqordanyń baspasóz qyzmeti.
– Sizben Astanada qaıta júzdeskenime qýanyshtymyn. Qazaqstan Dúnıejúzilik saýda uıymyna múshe bolar kezde elimizge úlken qoldaý bildirgenińizdi bilemiz. Búginde bizdiń el uıymnyń belsendi múshesi sanalady. 2020 jyly Astanada konferensııa ótkizý jóninde sheshim qabyldandy. Biz osy sharany tıisti deńgeıde ótkizý úshin kúsh jumyldyramyz, dedi Memleket basshysy.
Nursultan Nazarbaev Dúnıejúzilik saýda uıymynyń elder arasyndaǵy saýda-ekonomıkalyq qarym-qatynastardy nyǵaıtýdy jáne keńeıtýdi kózdeıtin basty qaǵıdattaryn Qazaqstannyń tolyq qoldaıtynyn atap ótti.
Robertý Azevedý Nursultan Nazarbaevqa qonaqjaılyq tanytqany jáne Qazaqstan men Dúnıejúzilik saýda uıymynyń aldaǵy yntymaqtastyǵyna arnalǵan máselelerdi talqylaýǵa múmkindik bergeni úshin alǵys bildirdi.
– Jenevadaǵy sońǵy kezdesýimizden keıin Qazaqstan men Dúnıejúzilik saýda uıymy arasyndaǵy yntymaqtastyqtyń tereńdegenin nyq sennimmen aıta alamyz. Sizdiń elińiz kóp jaqty saýda júıesin damytý qaǵıdattaryn árdaıym berik ustanyp keledi. Biz Qazaqstannyń 2020 jyly Mınıstrler konferensııasyn ótkizýge kelisim bergenine qýanyshtymyz. Bul búgingi álemde bolyp jatqan oqıǵalarǵa oraı erekshe mańyzǵa ıe bolyp otyr, – dedi Dúnıejúzilik saýda uıymynyń bas dırektory.
Sondaı-aq R.Azevedý jetekshi derjavalar arasyndaǵy saýda-ekonomıkalyq shıelenistiń basqa elderge tıgizetin saldaryna toqtaldy.