Taıaýda Brest qalasynda XY halyqaralyq elektr energııasy salasy qyzmetkerleriniń kásibı sheberligi jarysy ótti. Halyqaralyq jarysqa TMD-ǵa múshe memleketterdiń iri kompanııalarynyń eń myqty degen mamandary qatysty.
Dástúrli jarysta Qazaqstan, Belarýs, Reseı, Tájikstan jáne О́zbekstan elderiniń elektr jelileri kompanııalarynyń brıgadalary jóndeý jáne qyzmet kórsetý boıynsha sheberlikterin kórsetti. Komandalar tórt kúnge sozylǵan saıysta 7 kezeńnen ótti. Ár kezeń saıyn mamandardyń óz salalaryna qatysty erejelerdi, nusqaýlardy qanshalyqty biletini, elektr toǵynan zardap shekken adamdy qutqarý, órt shyqqan aımaqta jumys isteý sheberlikteri nazarǵa alynyp, árqaısysyna tıisinshe upaı berilip otyrdy.
Sonymen, tórt kún ishinde jınaǵan upaılardyń qorytyndysy boıynsha Qazaqstannan barǵan «KEGOC» AQ-tyń brıgadasy ekinshi orynǵa taban tiredi. Arman Ábilov, Almat Shoqanov, Medet Muqanǵalıev, Nıkolaı Iýdenkov jáne Iýrıı Fılatovtan jasaqtalǵan qazaqstandyq brıgada jarys ıeleri «BelEnergo» kompanııasynyń brıgadasyna ǵana ese jibergenin aıta keteıik.
Elektr energııasy salasy qyzmetkerleriniń kásibı sheberligi sarapqa salynatyn halyqaralyq jarys 2004 jyldan beri turaqty túrde ótkizilip kele jatyr. Atalǵan shara mamandardyń sheberligin tekserip qana qoımaı, olardyń ózge elderdegi áriptesterimen ózara tájirıbe almasýyna da yqpal etedi.
Erkejan AITQAZY,
«Egemen Qazaqstan»