Elbasy Nursultan Nazarbaev Shymkent qalasyna saparynda shahardy áleýmettik-ekonomıkalyq damý jónindegi keńeske qatysty.
Jıynda Memleket basshysy Shymkent qalasyn damytý jospary týraly áńgimelep, Qalany damytý úshin atqarylatyn jumystarǵa toqtaldy.
Shahardy damyta túsý úshin Elbasy birneshe baǵytty atap kórsetti. Eń birinshi, Shymkentti iri megapolıske aınaldyrý qajet. Ony júzege asyrý úshin 2023 jyldarǵa arnalǵan qurylys jónindegi keshendi josparyn ázirleýdi tapsyrdy. Sondaı-aq kiris bóligin ulǵaıtý úshin naqty sharalar qabyldaý qajettigin jetkizdi. Budan keıin qalanyń perspektıvasyn tıimdi paıdalana otyryp, ekonomıkany ilgeriletý maqsatynda naqty jumystar atqarýdy tapsyrdy.
Budan keıin N.Nazarbaev jastar máselesine nazar aýdaryp, qalada bilim salasyn damytýdyń qajettigin atap kórsetti.
«Shymkent – tez ósip kele jatqan shahar. Jalpy qala turǵyndarynyń 42 paıyzy – jastar, 420 myńnan astam. Iаǵnı, Shymkent – jastardyń qalasy. Muny umytpaý qajet. Alǵa qoıǵan maqsattarǵa qol jetkizý úshin bilikti mamandar kerek. Shymkent sondaı mamandardy daıarlaıtyn ortalyq retinde qalyptasýǵa tıis. Osyǵan oraı, oqý oryndarynyń mártebesin arttyryp, sheteldik bilim ordasymen áriptestikti keńeıtý qajet. Mekteptiń de deńgeıin kótergen jón. Ony júzege asyrý úshin eldegi zııatkerlik mektepterdiń tájirıbesine súıený qajet», dedi N.Nazarbaev.
Prezıdent bedeldi sheteldik ýnıversıtettermen yntymaqtastyq ornatyp, aǵylshyn tilinde bilim beretin baǵdarlamalardy kóbeıtýdi tapsyrdy. Sonymen qatar Shymkenttegi ýnıversıtetterdiń deńgeıin kóterip, Ortalyq jáne Ońtústik Azııa elderiniń stýdentteriniń oqýǵa yntasyn oıatý qajettigin aıtty.
Abaı ASANKELDIULY,
«Egemen Qazaqstan»
Shymkent qalasy